भारतलाई पराजित गर्दै इंग्ल्यान्डले आईसीसी महिला एकदिवसीय विश्वकप क्रिकेटको उपाधि जितेको छ ।लर्ड्समा आइतबार राती भएको फाइनलमा भारतलाई ९ रनको रोमान्चक जित निकाल्दै इंग्ल्यान्डले उपाधि जितेको हो ।
होम अफ क्रिकेटको रुपमा रहेको लर्ड्स मैदानमा इंग्ल्यान्डले दिएको २२९ रनको लक्ष्य पछ्याएको भारत ४८ ओभर ४ बलमा अलआउट हुँदै २१९ रनमा समेटियो । आन्या श्रुबसोलले किफायती बलिङ गरेपछि इंग्ल्यान्डले भारतमाथि रोमान्चक जित निकाल्दै उपाधि जितेको हो । उत्कृष्ट सुरुवात गरेको भारतले १९१ रन जोड्दा मात्र ४ विकेट गुमाएको थियो । ४२ ओभर ५ बलमा चौथो विकेट गुम्दा भारतलाई जितका लागि ३७ रनको आवश्यकता थियो । तर, श्रुबसोलले उत्कृष्ट बलिङ गरेपछि भारत थप २८ रन जोड्दा अलआउट हुँदै खेल इंग्ल्यान्डलाई सुम्पियो ।
भारतकी पुनम राउतले ८६ तथा हर्मनप्रित कौरले ५१ रन जोड्दै भारतलाई जितको बाटो देखाएपनि अन्य ब्याट्सवुमन चल्न नसक्दा पराजित हुन् पुग्यो । इंग्ल्यान्डको जितमा किफायती बलिङ गरेकी श्रुबसोलले ४६ रन खर्चिएर महत्वपूर्ण ६ विकेट लिए । यस्तै एलेक्स हार्टलीले दुइ विकेट लिईन् ।
यसअघि टस जितेर पहिले ब्याटिङ गरेको इंग्ल्यान्डले निर्धा्रित ५० ओभरमा ७ विकेट गुमाएर २२८ रन जोडेको थियो । इंग्ल्यान्डको लागि नटालिया सिभरले ५१ रनको अर्धशतकीय पारी खेलिन् । त्यस्तै सराह टेलरले ४५ तथा फ्रान विल्सनले ३४ रन जोडिन् । भारतकी झुलन घोस्वानीले ३ तथा पुनम यादवले २ विकेट लिईन् ।
योसंगै इंग्ल्यान्डले चौथो पटक एकदिवसीय विश्वकप क्रिकेटको उपाधि जितेको छ । अहिलेसम्म विश्वकप नजितेको भारत भने दोस्रो पटक उपाधि नजिक पुगेर उपविजेतामा सिमित बन्न पुगेको छ । प्रतियोगिताको सेमिफाइनलमा इंग्ल्यान्डले दक्षिण अफ्रीकालाई पराजित गरेको थियो । यता, भारतले साविकको बिजेता अष्ट्रेलियालाई पराजित गर्दै फाइनलमा इंग्ल्यान्डसंगको भेट पक्का गरेका थिए ।
