भारत मुम्बईको घाटकोपर क्षेत्रमा मंगलबार बिहान जीर्ण अवस्थामा रहेको एउटा चार तले घर ढल्दा कम्तीमा १७ व्यक्तिहरूको मृत्यु भएको छ । मृत्यु हुनेमा पाँच जना महिला र तीन वर्षकी एक बालिका पनि रहेका छन् । १९ जनालाई घरको भग्नावशेषबाट जीवितै उद्धार गरिएको छ ।
उक्त घरमा झण्डै १२ परिवारहरू बस्ने गरेका थिए । घरको तल्लो तलामा एउटा निजी नर्सिङ होम पनि सञ्चालित थियो । प्रत्यक्षदर्शीहरूका अनुसार मंगलबार बिहान पौन एघार बजेतिर सो घर अचानक भत्कियो ।
यो घरलाई बृहत् मुम्बई महानगरपालिकाले खतरनाक संरचनाको सूचीमा राखेको थियो र छ महिना पहिल्यै यसलाई खाली गर्नुपर्ने थियो । यस घरमा रहेको नर्सिङ होम शिवसेनाका एक जना स्थानीय नेताले चलाइरहेका थिए र उनैको निर्देशनमा घरको अवैध मर्मत कार्य भैरहेको थियो । त्यसैले घर ढल्नुमा शिवसेनाका ती नेताको जबर्जस्तीलाई प्रमुख कारण मानिएको छ । महाराष्ट्रका मुख्यमन्त्री देवेन्द्र फडणवीसले घटनाको निष्पक्ष छानबिन गर्ने आदेश दिएको हिन्दुस्तान डट कमको समाचारमा उल्लेख छ ।
