झापा, आषाढ २८
झापा जिल्लाको दुई बेग्लाबेग्लै स्थानमा आईतबार भएको सवारी दुर्घटनाबाट एक महिलासहित तीन जनाको ज्यान गएको छ।
मेची नगरपालिका १ स्थित मेची राजमार्गमा WB-02-R-5798 नम्बरको भारतीय कारको ठक्करबाट शान्बिनगर १ की ७५ वर्षिया मालती ठकुरीको मृत्यु भएको छ। पश्चिमबाट पूर्वतर्फ हुईकिदै आएको कारले सडक किनारमा बसिरहेकी महिलालाई अपरान्ह ४ बजे ठक्कर दिएको थियो। कारको ठक्करबाट महिलाको घटनास्थलमै मृत्यु भएको हो।
कार तथा चालकलाई इलाका प्रहरी कार्यालय भद्रपुरले नियन्त्रणमा लिएको छ।
त्यसैगरी तोपगाछी ५ मा रोकि राखेको ट्रकसंग को. ४ प ३९९३ नं. को मोटरसाइकल ठोक्किंदा मोटरसाइकलमा सवार दुई युवकको मृत्यु छ। मृत्यु हुनेमा सुनसरी धरान १६ का २८ वर्षिय हिमाल कन्दङवा र संखुवासभा चेपुवा ४ का २७ वर्षिय पेमा लामा रहेका छन्। राती करिब १० बजे पूर्व पश्चिम राजमार्गमा रोकि राखेको ना. ३ ख ६२९० नं. ट्रकसंग पूर्वबाट पश्चिमतर्फ जादै गरेको मोटरसाइकल ठोक्किएको थियो। गम्भिर घाइते भएका दुबैलाई उपचारकालागी तत्कालै लाईफ लाईन अस्पताल दमक लगिएकोमा उपचार हुँदा हुँदै उनीहरुको मृत्यु भएको हो।
ट्रक तथा चालकलाई इलाका प्रहरी कार्यालय दमकले नियन्त्रणमा लिएको छ।
