बिराटनगर असार ३०
विवाहित महिलालाई सामूहिक बलात्कार गरेको आरोपमा पक्राउ परेका खोटाङका दुई व्यक्तिलाई जिल्ला अदालत खोटाङले १२ वर्षको कैद सजाय सुनाएको छ ।
स्थानीय २५ वर्षीया महिलालाई सामूहिक बलात्कार गरेको आरोपामा पक्राउ परेका सुङ्देल(३ का ४० वर्षीय डिल्लीसेर राई र ३० वर्षीय राजन राईलाई अदालतले यस्तो फैसला सुनाएको हो । घरमा सुतिरहेकी महिलालाई कोही नभएको मौकापारी गत २०७१ साल पुस १३ गते राति ११ बजे ढोका फोरेर करेसा बारीमा लगी दुवै जनाले पालैपालो बलात्कार गरेको पीडित महिलाले दिएको उजुरीको आधारमा उनीहरुलाई प्रहरीले पक्राउ गरेको थियो । पक्राउ परेका दुवै जनाले मातेको सुरमा आफूहरुले गल्ती गरेको स्वीकारेको जिल्ला प्रहरी कार्यालय खोटाङका प्रहरी नायव उपरीक्षक विनोदराज खरेलले जनाए । बलात्कृत भएपछि पीडित महिलाले इलाका प्रहरी कार्यालय बाक्सिलामा दिएको उजुरीको आधारमा उनीहरुलाई पुस १८ गते काठ काट्दै गरेको अवस्थामा जङ्गलबाट पक्राउ गरिएको प्रहरीले जनाएको छ ।
