इटहरी
चन्दन रोनियार
वैदिक सनातन हिन्दु राष्ट्र नेपाल संयुक्त संघर्ष समीती पूर्वाञ्चलले आह्वान गरेको अनिश्चितकालिन पूर्वाञ्चल बन्दको दोश्रो दिन आज इटहरीमा सवारी तोडफोडका क्रममा प्रहरी र प्रदर्शनकारीबिच घम्साघम्सी भएको छ । हिन्दुवादी प्रदर्शनकारीले इटहरीको पश्चिम लाइनमा बा ३ ख ११०९ नम्बरको माइक्रो तोडफोड गर्ने क्रममा प्रहरी र प्रदर्शनकारीबिच घम्साघम्सी भएको हो । प्रहरीले तोडफोडमा संलग्न छ जनालाई पक्राउ गरेको छ । पक्राउ पर्नेहरुमा दुर्गा विक, कुवेश घिमिरे, प्रमोद यादव र जनार्दन पाण्डे सहित रहेका छन् । प्रहरीले सो क्रममा केहिलाई लाठि चार्ज समेत गरेको छ । प्रहरीको लाठि लागेर केहि प्रदर्शनकारी सामान्य घाइते भएका छन् । यसैबिच, इलाका प्रहरी कार्यालय इटहरीका प्रहरी नायब निरिक्षक नरबहादुर विकले सगरमाथा टेलिभिजनका पत्रकार ध्रुव ढकालमाथि समेत लाठि प्रहार गरेका छन् । घटनाका विषयमा रिपोर्टिङ गर्न पुगेका ढकालमाथि पत्रकार हुँ भन्दा भन्दै विकले लाठि प्रहार गरेको ढकालले जानकारी दिनुभएको छ ।
यता, हिन्दुवादीले आह्वान गरेको बन्द प्रहरीले बल प्रयोग गरेर खुलाएको छ । बिहानैदेखि बन्दको खासै प्रभाव नरहेको भएपनि इटहरीको पश्चिम लाइनमा भने प्रदर्शनकारीहरुले अवरोध गर्दै आएका थिए । तर प्रहरीले पश्चिम लाइनमा पनि बल प्रयोग गरी खुलाएको हो । अहिले इटहरी सहित पूर्वका अधिकांश ठाउँमा यातायात सूचाउ छ भने पसल व्यवसाय र विद्यालय पनि खुला छ । यता प्रदर्शनकारीहरु पुनः संगठित हुदै प्रदर्शनको तयारीमा रहेका छन् ।
