विराटनगर, १९ वैशाख ।
विराटनगर महानगरपालिकामा निर्मित नाली तथा सडकहरु निर्माण पुरा नहुँदै भत्किन थालेको छ । विराटनगरको सुन्दरतासँग हेरिएको मझौला सहर एकिकृत वातावरणीय सुधार परियोजना अन्तरगतका कार्यक्रमहरु प्रभावकारी नदेखिएको हो । त्यसको पुष्टी बिराटनगर महानगरपालिकाको मिल्सएरियामा निर्माण भएको नाली निर्माणको कामले पुष्टी गर्छ ।
हरेक दिन बिराटनगर महानगरपालिकाका मेयर भीम पराजुली सहितको टोलीले अनुगमन गरेपनि ठेकेदार तथा उपभोक्ता समितिको बद्मासीका कारण समस्या देखिएको हो । विकास निर्माणका काम गुणस्तरहीन र कमशल खालको रहेको स्थानीयले आरोप लगाउँदै आएका छन् । अझ विराटनगर महानगरपालिका वडा नम्बर १५ मिल्सएरियामा बनेको पक्की नाला एक महिना पुरा नहुँदै भत्किएको छ । नाला निर्माण पछि सडकको मुहार फेरिने भयो भनेर आशा पालेर बसेका स्थानीयलाई नालाको काम कामै नलाग्नेगरी भत्किएपछि स्थानीय आक्रोशित बनेका छन् । निर्माणमा कमशल सामाग्रीको प्रयोग भएको कारण नाला एक महिना पनि नबित्दै भत्किएको एक स्थानीयले आवर विराटनगरलाई जानकारी दिए । उनका अनुसार निर्माण पुरा भएको एक महिना पनि नहुँदै नाला भत्किएको हो । स्थानीयले पटक पटक महानगरपािकालाई जानकारी गराउँदा पनि कसैले वास्ता नगरेको स्थानीयको आरोप छ। ‘हामीले महानगरलाई काम कमशल भएको छ भनी पटक पटक जानकारी गरायौ, एक स्थानीयले भने, ‘तर हामीले भनेको कुरा महानगरले सुनेन बनाएको एक महिना नपुग्दै अहिलेको सामान्य बर्षा नै भत्कियो ।’
