सुमन सुस्केरा
विराटनगर, १० जेठ ।
वुद्ध एयरले बिराटनगरबाट विहानी पहिलो उडान भर्ने भएको छ । अघिल्लो दिन सँझ बिराटनगर आएर बसेको जहाज अब बिहान ७ बजे नै उडान भर्नेगरी तयारी थालेको हो । जुन १ तारिख देखि बिराटनगरबाट काठमाडौँको लागि बिहान ७ बजे नै उडान हुने बुद्ध एयर बिराटनगरका स्टेशन म्यानेजर कौशल भण्डारीले जानकारी दिए । अघिल्लो दिन बेलुका ६ बजे काठमाडौँबाट उड्ने जहाज राती बिराटनगरमा बस्ने र त्यही जहाजले भोली पल्ट बिहानका यात्रुलाई ७ बजे उडाउने उनको भनाई छ । बिराटनगरको लागि यो पहिलो प्रयोग हो । मौसमको खराबी बाहेक बुद्ध एयरले जुन १ तारिख देखि नियमित बिहान ७ बजे उडान गर्न लागेको हो ।
त्यस्तै दोश्रो उडान ९ बजेर ४० मिनेटमा, तेश्रो उडान १२ बजेर १५ मिनेट जाँदा हुने छ । चौथो उडान १ बजेर १५ मिनेट र अन्तिम उडान ४ बजेर १० मिनेटमा हुने बुद्ध एयरले जनाएको छ। अहिले बिराटनगरबाट पहाडी जिल्लाहरुमा हप्तामा ३ पटक बुद्धले उडान भर्दै आएको छ । हप्तामा बिराटनगरबाट तुम्लिङटार हरेक हप्ताको ३ पटक आईतबार, बुधवार र शुक्रवार उडान हुन्छ ।
त्यस्तै अन्य जहाजहरुले भने बिराटनगरबाट दैनिक ३ पटक सम्म उडान गर्दै आएका छन् । यति एयरलाईन्सले दैनिक बिराटनगर – काठमाडौँ ३ पटक, सौर्यको २ , श्री एयरका ३ र नेपाल एयरलाईन्सको १ पटक उडान हुँदै आएको छ ।
