बिराटनगर जेठ १८ ,
बिराटनगरको महेन्द्र चोकमा तपाइँले केहि दिन देखि एउटा डिजिटल एलइडी बोर्ड देख्नु भएको होला , उक्त बोर्ड कसैले आइपिएल देखाउन लगाएको भनिरहेका छन् भने कसैले फुटबल विश्वकप देखाउने अनुमान लगाइरहेका छन् । उक्त डिजिटल बोर्ड न विश्वकपको लागि हो न क्रिकेटको लागि , उक्त बोर्ड त डिजिटल बिज्ञापन देखाउन लगाइएको एलइडी बोर्ड हो । भिज्वल बिज्ञापन एजेन्सी बिराटनगरले ल्याएको यो बिराटनगरको लागि नयाँ प्रबिधि भएपनि विश्वमा धेरै देशमा यस्ता प्रबिधि चलिरहेका छन् । 
८ फिट लम्बाई र १२ फिट चौडाइ रहेको उक्त डिजिटल बोर्डमा बिज्ञापन बजाउन महिनाको १२ देखि १५ हजारसम्म लाग्ने संचालक बिनय न्यौपानेले बताए । करिब १२ लाख रुपैया लागतमा उक्त बोर्ड बिराटनगरमा पहिलो पटक जडान भएको र आगामी दिनमा बिराटनगरका ५ वटा ठाउँमा उक्त डिजिटल बोर्ड लगाइने न्यौपानेले जानकारी दिए । 
अहिले चलिरहेको होर्डिङ बोर्ड भन्दा आकर्षक देखिने हुनाले उक्त डिजिटल बोर्डले शहरको सुन्दरतामा पनि टेवा पुर्याउने न्यौपानेले दाबी गरे ।
