इश्लामावाद फाल्गुन १४ ।
भारतले आफूमाथि आक्रमण गरेको र पाकिस्तानलाई पनि प्रतिवाद गर्ने अधिकार रहेको पाकिस्तानले बताएको छ । पाकिस्तानका विदेशमन्त्री शाह महमूद कुरेसीले इश्लामाबादमा पत्रकारहरुसँग कुरा गर्दै सो कुरा बताएका हुन् । भारतले मंगलबार बिहान पाकिस्ताभित्र विमानबाट बम हानेको थियो ।
इकोनोमिक्स टाइम्सले जनाएअनुसार पाकिस्तानका प्रधानमन्त्री इमरान खानले भारतको आक्रमणको घटनालाई लिएर विशेष बैठक डाकेका छन् । पाकिस्तानका विदेशमन्त्रीले लाइन अफ कन्ट्रोलका बारेमा भएको सहमति पनि भारतले उल्लंघन गरेको जनाएका छन् ।
उनले आफ्नो आत्मरक्षाका लागि पाकिस्तानले भारतलाई उपयुक्त जवाफ दिनेसमेत बताएका छन् । पाकिस्तानका विदेशमन्त्रीले मंगलबार नै विदेश मन्त्रालयका अधिकारीहरुसँग आपतकालीन बैठक गरेका थिए । त्यसपछि उनले प्रधानमन्त्री खानलाई ब्रिफिङ गरेको बताइएको छ ।
