एजेन्सी । अमेरिकाले 'भविष्यको युद्ध क्षेत्र'का रूपमा अन्तरिक्षमा आफ्नो हितको सुरक्षार्थ अन्तरिक्ष कमाण्डको स्थापना गरेको छ ।
राष्ट्रपति डोनाल्ड ट्रम्पले बिहीवार आधिकारिक रूपमा अन्तरिक्ष कमाण्डको शुरुवात गरे । अमेरिकी सेनाका जनरल डब्ल्यु रेमण्डलाई नवगठित अन्तरिक्ष कमाण्डको नेतृत्व दिइएको छ । अमेरिकी राष्ट्रपति निवास व्हाइट हाउसको रोज गार्डनमा आयोजित समारोहमा बोल्दै ट्रम्पले भने, 'यो ठूलो पहल हो । नवगठित अन्तरिक्ष लडाकु कमाण्ड 'स्पेसकम' अन्तरिक्षमा अमेरिकी हितको रक्षा गर्नेछ, जुन भविष्यको युद्धक्षेत्र हो ।'
उक्त समारोहमा उपराष्ट्रपति माइक पेन्स, रक्षामन्त्री मार्क एस्पर पनि उपस्थित थिए ।
ट्रम्प प्रशासनको के बुझाई छ भने रुस र चीन अन्तरिक्षमा अमेरिकालाई सम्भावित खतरा पैदा गर्न सक्छन् । समारोहमा ट्रम्पले भने, 'अब जो कसैले अमेरिकाको अहित गर्ने मनासय राख्छ, हामीलाई अन्तरिक्षमा चुनौती दिने कोशिस गर्छ उसले ठूलो मूल्य चुकाउनुपर्ने हुन्छ ।' -एजेन्सीको सहयोगमा
