स्पेनमा पनि कोरोना भाइरस अर्थात कोभिड-१९ काे कारण एक जनाको ज्यान गएकाे पुष्टि भएकाे छ । उनको फेब्रुअरी १३ तारिखमा भ्यालेन्सिया अस्पतालमा मृत्यु भएकाे थियाे ।
भ्यालेन्सियाका स्वास्थ्यकर्मीले ती व्यक्तिको कोरोना भाइरसका कारण नै मृत्यु भएको पुष्टि गरेका छन् । यो नै कोरोना संक्रमणबाट स्पेनमा भएको पहिलो मृत्यु जनाइएको छ ।
डेली मेलको अनुसार ती व्यक्ति नेपाल भ्रमण गरेर फर्किएका थिए । तर समाचारमा उनलाई नेपालमै संक्रमण भएको हो या अन्य ठाउँबाट भएको भन्ने चाहिँ खुलाइएको छैन ।
डेली मेलले बताए अनुसार नेपाल भ्रमण गरेर फर्किएपछि उनी बिरामी भएका थिए । त्यसपछि उनलाई अस्पताल भर्ना गरिएको थियो । त्यतिबेला उनको अवस्थालाई ‘एक प्रकारको निमोनिया’ बाट ग्रसित भनेर उल्लेख गरिएको थियो ।
उनको मृत्युबारे पुष्टि गर्दै स्थानीय स्वास्थ्य अधिकारीले भने, ‘ आर्नउ डे भिलानोभा अस्पतालमा उपचाररत एक व्यक्तिको फेब्रुअरी १३ मा मृत्यु भएको छ। भ्यालेन्सिया समुदायमा दुई नयाँ संक्रमित भेटिएका छन् । यससँगै यहाँ संक्रमितको संख्या १९ पुगेको छ ।’
