अमेरिकाका नयाँ राष्ट्रपति बाइडेनलाई विश्वभरबाट बधाई तथा शुभकामना

अमेरिकाका नयाँ राष्ट्रपति बाइडेनलाई विश्वभरबाट बधाई तथा शुभकामना

संयुक्त राज्य अमेरिकाको राष्ट्रपतिमा जो बाइडेनले बुधबार शपथ लिएसँगै विश्वका नेताहरुले उनको कार्यकाल सफल हुने विश्वास व्यक्त गर्दै बधाई दिएका छन्।

विगत चार वर्ष डोनाल्ड ट्रम्प प्रशासनका उतारचढाब झेलेका देशका नेताहरुले डेमोक्रेटिक पार्टीबाट निर्वाचित बाइडेनले सुझबुझपूर्ण व्यवहार गर्ने विश्वास लिएका छन्।

युरोपेली परिषदका अध्यक्ष चाल्र्स मिकेलले राष्ट्रपति बाइडेन र उपराष्ट्रपति कमला ह्यारिसलाई ट्विटमार्फत बधाई दिँदै भनिन्, 'युरोपेली युनियन र अमेरिकाबीचको सम्बन्ध थप प्रगाढ हुनेछ।' युरोपेली आयोगकी अध्यक्ष उर्सुला भन डर लियेनले भने, 'नयाँ बिहानी, नयाँ सुरुआतका लागि युरोप तयार छ।'

इरानका राष्ट्रपति हस्सन रौहानीले पनि ट्रम्पको पलायनबाट आफूहरु खुसी भएको बताएका छन्। उनले आणविक विषयलाई लिएर इरानमाथि ट्रम्पको कार्यकालमा लगाइएका आर्थिक नाकाबन्दीहरु फुकुवा हुने विश्वास व्यक्त गरे। उनले भने, 'बाइडेन प्रशासनले गत चार वर्षमा इरानमाथि गरिएका अपराधलाई हटाउन मद्दत गर्ने विश्वास लिएका छौं। इरानसँग भएको आणविक सम्झौतामा अमेरिका पुनः फर्किने हामीले आशा गरेका छौं।'

इजरायलका प्रधानमन्त्री बेन्जामिन नेतन्याहूले दुई देशबीच लामो समयदेखि जारी मैत्रीपूर्ण सम्बन्ध अझ प्रगाढ बनाउन राष्ट्रपति बाइडेनसमक्ष आग्रह गर]। उनले भिडियो सन्देशमार्फत भनेका छन्, 'अमेरिका-इजरायल सम्बन्धलाई थप गति प्रदान गर्न आफ्नो मुलुक तयार छ। इजरायल र अरब मुलुकहरुबीच शान्ति कायम गर्ने प्रयास थप विस्तार हुने तथा इरानका तर्फबाट उत्पन्न त्रासलाई साम्य बनाउने चुनौतीलाई मिलेर सामना गर्न इजरायल प्रतीक्षारत छ।'

नेटोका महासचिव जेन्स स्टोल्टेन्बर्गले उत्तर अमेरिका र युरोपबीचको मित्रता हाम्रो सुरक्षाको आधार हो, र बलियो नेटो युरोप र अमेरिका दुवैका लागि हितकर रहने बताए। उनले नेटोका गठबन्धन मुलुकहरुले चीनको तिव्र विकास, अफगानिस्तान र इराक समेतमा आतंकवादको चुनौती तथा रसियाका गतिविधिमाथि विचार गर्न मिलेर जानुको विकल्प नरहेको बताए। पोप फ्रान्सिसले राष्ट्रपति बाइडेनलाई विश्वभर 'भाइचारा र शान्ति' लाई प्रवद्र्धन गर्न आग्रह गरे।

रसियाली राष्ट्रपतिको कार्यालयका प्रवक्ता दिमित्री पेस्कोभले संयुक्तराज्य अमेरिकासँग साँचो अर्थमा मित्रवत सम्बन्ध स्थापना गर्न रसिया तयार रहेको उल्लेख गरे।

रसियाली विदेश मन्त्रालयले जारी गरेको अर्को विज्ञप्तिमा हतियार नियन्त्रणसम्बन्धी आगामी वार्तामा बढी नै रचनात्मक पहल अमेरिकी नेतृत्वबाट प्रस्तुत हुने जनाएको छ। जर्मनीकी चान्सलर एन्जेला मर्केलले जर्मन–अमेरिकी मित्रता र सहयोगमा नयाँ अध्याय सुरु हुने अपेक्षा गरिएको भन्दै बाइडेनको कार्यकाल सफल हुने विश्वास व्यक्त गरिन्।

फ्रान्सका राष्ट्रपति इमानुएल म्याँक्रोले ट्विट गर्दै भने, 'अमेरिकी जनताका लागि यो विशेष अवसरका लागि बधाई र उत्तरोत्तर प्रगतिको कामना', उनले भने,'हामी सँगै, साथमा छौं। हाम्रो समयका चुनौतीको सामना गर्न हामी अझ बलियो हुनेछौं। हाम्रो पृथ्वीको रक्षा गर्न अझ बलियो हुनु पर्नेछ। पेरिस सम्झौतामा पुनः स्वागत छ।'

डोनाल्ड ट्रम्पसँग निकै हिमचिम रहेको भनी आलोचित बेलायती प्रधानमन्त्री बोरिस जोन्सनले पनि बाइडेनसँग निकट सम्बन्ध राखेर कार्य गर्न चाहेको बताए। उनले भने, 'कोभिड विरुद्धको संघर्ष, जलवायु, प्रतिरक्षा, सुरक्षा हाम्रा साझा मुद्दा हुन्। विश्वमा प्रजातन्त्रको प्रवद्र्धन र रक्षा गर्नु हामी दुवै मुलुकको लक्ष्य नै हो।'

क्यानडाका प्रधानमन्त्री जस्टिन ट्रुडोले पनि कोरोनाभाइरस, जलवायु परिवर्तन र आर्थिक पुनरुत्थानजस्ता मुद्दामा राष्ट्रपति बाइडेनसँग मिलेर कार्य गर्न आफू तयार रहेको बताए।

भारतीय प्रधानमन्त्री नरेन्द्र मोदीले ट्विट गर्दै भने, 'संयुक्तराज्य अमेरिकाको राष्ट्रपतिको शपथ लिनु भएकामा आफ्ना तर्फबाट बाइडेनलाई न्यानो बधाई। भारत-अमेरिका रणनीतिक सम्बन्धलाई थप बलियो बनाउन म तयार छु।'

जापानका प्रधानमन्त्री योसिहिदे सुगा र दक्षिण कोरियाका राष्ट्रपति मून जाए–इनले पनि राष्ट्रपति बाइडेनलाई कार्यकाल सफलताको बधाई दिँदै आआफ्ना मुलुकसँग अमेरिकाले पुरानो मित्रता यथावत रहने र थप सुदृढ हुने विश्वास व्यक्त गरेका छन्।

कुवेत, कतार, बहराइन, साउदी अरेबिया र संयुक्त अरब इमिरेट्सका नेताहरुले पनि बाइडेनको कार्यकाल सफल हुने विश्वास व्यक्त गर्दै बधाई सन्देशहरु पठाएका छन्।

प्यालेस्टिनी राष्ट्रपति महमुद अब्बासले यस क्षेत्रमा शान्ति र स्थायित्वका लागि बाइडेनसँग मिलेर कार्य गर्न आफू अधैर्यपूर्वक प्रतीक्षा गरिरहेको बताएका छन्।

यो खबर पढेर तपाईलाई कस्तो महसुस भयो ?

Loading spinner

तपाईको प्रतिक्रिया लेख्नुहोस्