सिन्धुपाल्चोक
कलाकारले बाढी प्रभावित सिन्धुपाल्चोकको मेलम्ची र हेलम्बुमा प्रभावितलाई ४३ वटा पक्की घर निर्माण गरिदिने भएका छन् । देशभरका कलाकारद्वारा सञ्चालित सिन्धु सहयोग कोषको समूहले मेलम्ची क्षेत्रको स्थलगत अनुगमन गरेपछि बाढीले बगाएको मेलम्चीको दनुवार बस्तीमा १९ वटा पक्की घर बनाइदिने घोषणा गरिएको छ ।
त्यस्तै हेलम्बुको किउलमा मगर बस्तीका २४ पक्की घर बनाइदिने कलाकारहरूले जनाएका छन् । गत साता जिल्ला समन्वय समितिका प्रमुख कृष्ण गोपाल तामाङको नेतृत्वमा कोषका सह-संयोजक नायिका करिष्मा मानन्धर लगायत कलाकारको टोली मेलम्ची र हेलम्बुका घर बनाउने स्थान निरीक्षण गरेको करिष्माले सामाजिक सञ्जाल फेसबुकमार्फत जानकारी दिनुभएको छ ।
मेलम्ची र हेलम्बुसहित पाँच पोखरीमा आकर्षक पक्की घरसहितको होमस्टे बनाउने आफूहरूको तयारी रहेको र यसबारे चाँडै योजना सार्वजनिक गर्ने कोषका सदस्य एवं सङ्गीतकार चेतन सापकोटाले जानकारी दिनुभयो ।
-रेडियो नेपाल
