विराटनगर ।
उपचारको लागि भर्ना भएका एक जना विरामीको मृत्यु भएपछि विराटनगरस्थित गोल्डेन अस्पतालमा तोडफोड भएको छ । मोरङको धनपालथान गाउँपालिका–६ कदमाहाका ६७ वर्षीय अहमद हुसेनको पिलोको शल्याक्रिया गर्दा मृत्यु भएपछि आक्रोसित आफन्तले सोमबार राती अस्पताल तोडफोड गरेका हुन् । अस्पताल तोडफोड भएपछि मोरङ प्रहरीले सात जनालाई पक्राउ गरेको छ । तोडफोड र कुटपिटमा संलग्न भएका आरोपमा सात जनालाई सोमबार राती प्रहरीले घटनास्थलबाटै पक्राउ गरेको हो ।
पक्राउ पर्नेमा धनपालथान–६ का ३४ वर्षीय मोहमद आजाद, ३३ वर्षीय मोहमद अख्तर, ३० वर्षीय मोहमद साजद, २३ वर्षीय मोहमद जुवेर, ३८ वर्षीय नारायण सहनी, ३६ वर्षीय मोहमद इरसाद र २० वर्षीय मोहमद सुवेर रहेको छन् । घटनाको विषयमा अनुसन्धाc भइरहेको मोरङ प्रहरीका प्रहरी नायव उपरीक्षक दिपक श्रेष्ठले जानकारी दिनुभयो ।
मलद्धारमा रहेको पिलोको शल्यक्रिया गरिएका हुसेनको मृत्यु भएपछि आक्रोशित परिवारका सदस्य र आफन्त राति १०ः१५ बजेतिर तोडफोड गरेका थिए । सोमबार बिहान भर्ना गरिएका बिरामीको सामान्य शल्याक्रियाकै क्रममा मृत्यु भएको थियो । अस्पताल र चिकत्सकले लापरवाही पूर्ण तरिकाले शल्याक्रिया गर्दा यस्तो घटना भएको मृतकका आफन्तको भनाई छ ।
हुसेनको अस्पतालका सर्जन डा. सरोज राजवंशी नेतृत्वको चिकित्सक टोलीले सोमबार शल्यक्रिया गरेका थिए । शल्यक्रियापछि विरामीको अवस्था गम्भीर बनेको कारणले अस्पतालले उनलाई थप उपचारका लागि भेन्टिलेटरमा राखेको थियो । उनको भेन्टिलेटेरमै राति १० बजेतिर मृत्यु भएको हो ।
हुसेनको मृत्युपछि २५÷३० जनाको संख्यामा भेला भएका मृतकका आफन्त र परिवारका सदस्यले तोडफोड गर्दा अस्पतालको काउण्टरको दुईवटा झ्यालमा क्षति पुगेको अस्पतालका प्रशासकीय अधिकृत सन्तोष मेहताले जानकारी दिनुभयो । तोडफोडबाट अस्पतालको काउण्टरको झ्यालका शिशा फुटेको छ ।
