काठमाडौं
जनगायक जुठबहादुर खड्की ‘जेबी टुहुरे’को निधन भएको छ । उनको ७८ वर्षको उमेरमा बयोधा अस्पतालमा उपचारका क्रममा बिहीबार निधन भएको हो ।
भदौ १ गते कलंकीस्थित घरमा पक्षघात भएर लडेका उनलाई तुरुन्तै अस्पताल पुर्याइएको थियो । उपचारमा संलग्न डा. रोहन झाका अनुसार अस्पताल पुर्याउँदा उनको मस्तिस्कमा रगत जम्नुका साथै हातखुट्टा चल्न छाडेको थियो ।
मुटु, फोक्सो, महुमेह र उच्च रत्तचाप लगायतका दीर्घरोग भएका कारण उनको शल्यक्रिया हुन सकेन र उपचारका क्रममा निधन भएको हो ।
जनसांस्कृतिक महासंघका निवर्तमान अध्यक्ष सरल सहयात्रीका अनुसार दोस्रो संविधानसभा सदस्य समेत रहेका टुहुरेको पार्थिव शरीर अन्तिम श्रद्धान्जलीका लागि दिउँसो साढे १ बजेदेखि २ बजेस्म्म पार्टी कार्यालय पेरिसडाँडामा राखिने छ । उनको आजै पशुपति आर्यघाटमा अन्त्येष्टि गरिने बताइएको छ ।
को हुन् जेबी टुहुरे!
बि.स. २०१६/१७ सालदेखि नै गीत गाउन थालेका टुहुरेले २०२४ सालदेखि जनताका गीत गाउन थालेका थिए । उनको ‘आमा दिदी बहिनी हो, कति बस्छौ दासी भएर …’ निकै चर्तित छ । उनका १५० बढी जनवादी गीत रेकर्ड छन् ।
राजनीतिक रुपमा उनको आवद्धता माले, एमाले हुँदै पछिल्लो समय माओवादी केन्द्रमा थिए । माओवादीले उनलाई दोस्रो संविधानसभामा सदस्य पनि बनाएको थियो ।
२०७५ सालमा उनको नाममा जेबी टुहुरे फाउण्डेसनसमेत स्थापना गरिएको छ । फाउण्डेसनको अध्यक्ष उनकी छोरी निर्भीका छिन् ।
