विराटनगर । विराटनगरका तीन स्थानमा दशैं, तिहार र छठ पर्व लक्षित सुपथमूल्यका पसल सञ्चालनमा आएका छन् । उपभोक्तालाई चाडपर्वमा सहूलियत दरमा खाद्यन्न तथा खाद्य वस्तु बिक्री गर्नका लागि सरकारले तोकेका तीन निकायले विराटनगरमा आफ्नै कार्यालय परिसरबाट सामाग्री बिक्री गर्ने गरि पसल सञ्चालनमा ल्याएका हुन् ।
खाद्य व्यवस्था तथा व्यापार कम्पनी लि.को प्रादेशिक कार्यालय अन्तर्गत कोशी प्रोजेक्ट, साल्ट ट्रेडिङ कार्यालय विराटनगर र दुग्ध वितरण आयोजना विराटनगरमा सहूलियतमा सामाग्री पाइने छ । यसैगरी प्रदेश १ का विभिन्न जिल्लाका १४ स्थानमा सुपथमूल्य पसल सञ्चालनमा आएका छन् । प्रदेश १ मा खाद्य व्यवस्था तथा व्यापार कम्पनी लि. अन्तर्गत ११ वटा, साल्ट टे«डिङका दुई र दुग्ध विकास संस्थान अन्तर्गत एक स्थानबाट सूपथमूल्यमा खाद्य सामाग्री, नुन–चिनी तथा दुग्ध पदार्थ सम्बन्धि सामाग्री पाइने भएका छन् ।
खाद्य व्यवस्था तथा व्यापार कम्पनी लि. ले प्रादेशिक कार्यालय विराटनगर अन्तर्गत कोशी प्रोजेक्ट नजिक, मुख्य शाखा कार्यालय बिर्तामोड, शाखा कार्यालयहरु भोजपुर, संखुवासभा र डिपो हटियागोला, शाखा कार्यालय ताप्लेजुङ, ओखलढुंगा, शाखा दिक्तेल, डिपो ऐसेलुखर्क र खोटाङ, शाखा कार्यालय सोलुखुम्बुमा सूपथमूल्य पसल सञ्चालनमा ल्याएको प्रमुख महेन्द्र सिटौलाले जानकारी दिनुभयो । सेवाग्राही आए सरकारले तोकेको मूल्यमा सामाग्री उपलब्ध गराउने सिटौलाले जानकारी दिनुभयो ।
सञ्चालनमा आएका पसलबाट स्थानीय बासमती चालम प्रतिकेजी १०५ रुपिँया, स्टिम जिरा मसिनो ६० रुपिँया, सानो मंसुली प्रतिकेजी ४५ रुपिँया, मसुरो दाल प्रतिकेजी १२० रुपिँया, मास दाल प्रतिकेजी १६५ र रहर दाल प्रतिकेजी १७० रुपिँयाले उपलब्ध हुने प्रादेशिक प्रमुख सिटौलाले जानकारी दिनुभयो ।
साल्ट ट्रेडिङसँग छैन चिनी, नुन मात्रै
यसैगरी नुन र चिनी बिक्री गर्ने साल्ट टे«डिङ अन्तर्गत विराटनगर कार्यालय र शाखा कार्यालय बिर्तामोडमा सूपथमूल्यको पसल सञ्चालन हुने प्रादेशिक कार्यालय प्रमुख राधेश्याम चौधरीले जानकारी दिनुभयो । उहाँका अनुसार नुन १८ रुपिँया र चिनी ८० रुपिँया प्रतिकेजी उपलब्ध हुनेछ । तर, अहिले साल्ट ट्रेडिङसँग चिनी अभाव रहेको उहाँले जानकारी दिनुभयो ।
दुग्ध विकास संस्थान अन्तर्गतका खाद्य वस्तुको सुपथमूल्य पसल भने विराटनगरस्थित आयोजनाको कार्यालय परिसरमा मात्रै सञ्चालन हुने प्रमुख गणेश यादवले जानकारी दिनुभयो । दुग्ध वितरण आयोजना विराटनगरले अन्य कुनै स्थानमा सुपथमूल्यको पसल सञ्चालन नगर्ने उहाँले जानकारी दिनुभयो ।
शनिबारबाहेक हरेक दिन बिहान १० देखि ५ बजेसम्म सञ्चालनमा आउने सहुलियत पसलमा साल्टको बिक्री केन्द्रबाट बिक्री हुने चिनी र नुनको लागि मात्रै कोटा तोकिएको छ । एक व्यक्तिले ६ किलो नुन र २ किलो मात्रै चिनी किन्न पाउने छन् भने अन्य वस्तु चाहेजति खरिद गर्न सकिने छ ।
छठको भोलिपल्ट अर्थात कात्तिक २४ गतेसम्म ५५ दिनसम्म सुपथ मूल्य पसल सञ्चालनमा आउने छ । चाडपर्वमा बजारमा उपभोक्ता मूल्य नियन्त्रण गर्न सञ्चालनमा ल्याइएको सुपथ मूल्य पसलमा बजार भन्दा कम्तीमा २ रुपैयाँमा सस्तोमा खाद्य वस्तु उपभोक्ताले खरिद गर्न सक्ने सरकारी दाबी छ ।
सहुलियत पसलमा उपभोक्ताले सबैखाले खाद्य वस्तुमा कम्तीमा दुई रुपैयाँदेखि बढीमा १० रुपैयाँसम्म प्रतिकिलोमा छुट पाउने छन् । खाद्य र साल्टको दुवै पसलहरुमा नुन प्रतिकिलोमा दुई रुपैयाँ, चामल, दाल, चिउरा र आँटामा प्रतिकिलो पाँच रुपैयाँ छुट पाइने छ । यस्तै तोरी र सूर्यमुखीको तेलमा प्रतिलिटर ५ रुपैयाँ र भटमासको तेलमा प्रतिलिटर १० रुपैयाँ छुट पाइने छ । दुग्ध विकास संस्थाको उत्पादन पनि छुटमा बिक्री केन्द्रमा हुने भएपनि कुन वस्तुमा कति छुट भन्ने निर्क्यौल नभएको खाद्य व्यवस्था तथा व्यापार कम्पनीले जनाएको छ ।
