नेपाल क्रिकेट संघ (क्यान) ले प्रदेश एकको क्रिकेट प्रशिक्षकका रुपमा विराटनगरका पुष्प थापालाई चयन गरेको छ । क्यानले देशका सात वटा प्रदेशका लागि १० जना प्रशिक्षक चयन गरेको हो ।
विराटनगर निवासी पुष्प थापा नेपालका लागि सन् २००८ मा मलेशियामा भएको अन्डर १९ क्रिकेट विश्वकप खेलिसकेका छन् । साथै उनले प्रदेश एकको टोलीको कप्तानी गरिसकेका छन् ।
थापाले हामीसँग कुरा गर्दै क्यानले दिएको जिम्मेवारी पुरा गर्न सक्नेमा विश्वस्त हुदै प्रशिक्षक नियुक्त भएकोमा खुसी व्यक्त गरे । उनले भने,'छनौट भए भने यि कुराहरु गर्छु भनेर सोच बनाएको थिएँ । अब त्यसैमा लागेर क्रिकेटका लागि काम गर्नेछु ।'
उनले गत वर्ष आवर विराटनगरसँग कुरा गर्दै आफ्नो आर्थिक अवस्था र परिवारको जिम्मेवारीका कारण क्रिकेट छाड्नु पर्ने अवस्थामा पुगेको बताएका थिए । उनले भनेका थिए 'सबै कुरा छाडेर क्रिकेटको पछि लागेको थिए । क्यानले माग गरेको प्रदेश प्रशिक्षकको लागि आवेदन दिएको छु । जिम्मेवारी दिनु भयो भने धेरै समस्याका समाधान हुनेछ र मेरो क्रिकेट यात्रा निरन्तर हुनेछ ।'
क्यानले प्रदेश एकमा थापाका साथै दुईमा प्रकाश शर्मा र सुनिल कुमार साह, बागमती प्रदेशमा संजय महर्जन, गण्डकी प्रदेशमा रिजन प्राजु, लुम्बिनि प्रदेशमा बसन्त शाही र जमित ए अन्सारी, कर्णाली प्रदेशमा बिरेन्द्र शाही तथा सुदुरपश्चिम प्रदेशमा खेमराज भट्ट र जानकी भट्टलाई प्रशिक्षक चयन गरेको छ ।
हेर्नुहोस् पुरानो भिडियो
