बिराटनगर । प्रहरी महानिरीक्षक शैलेश थापा क्षेत्रीले जिल्ला प्रहरी कार्यालय मोरङको निरीक्षण गर्नु भएको छ । आज दिउँसो जिल्ला प्रहरी कार्यालय मोरङको निरीक्षणमा आउनु भएका महानिरीक्षक क्षेत्रीले सेवाग्राहीसँग समेत अन्तरक्रिया गर्नु भएको थियो ।
त्यस क्रममा उहाँले प्रहरी पेशाप्रति इमान्दार र कर्तव्यनिष्ट हुनुपर्ने निर्देशन दिनु भएको थियो । कार्यालयमा प्रहरी सेवा लिन आएका केही सेवाग्राहीसँग सेवा बारे बुझ्नु भएका क्षेत्रीयले प्रहरी कर्मचारीहरुको आचार संहिता सम्बन्धी कार्यादेश २०७७ को अक्षरस पालना गर्न निर्देशन दिनुभएको हो ।
नागरीक मैत्री प्रहरीको अवधारणा अनुसार हरेक क्षेत्रका ब्यक्तित्वहरुसंग समन्वय गरी नागरिकलाई छिटो छरितो एवं पारदर्शी प्रहरी सेवा उपलब्ध गराउन उहाँले मोरङ प्रहरीलाई निर्देशन दिनु भएको थियो । त्यस क्रममा जनचेतनामूलक कार्यक्रमहरु संचालन, अनुसन्धान पद्दतीलाई प्रविधीमैत्री बनाउदै, प्रमाण र परिणाममूखी अनुसन्धान पद्धतीबाट नागरिकले सुुरक्षा अनुभुत गर्नुपर्नेमा उहाँको जोड दिनुभएको थियो ।
