विराटनगर । विराटनगर वरगाछी चौकको पहिचान फर्काउन वरको कृत्रिम स्तम्भ निर्माण गरिने भएको छ । स्थानीयले वरगाछीको पहिचान झल्काउन ‘वरगाछी’को स्तम्भ निर्माण गर्ने भएका हुन् ।
नेपाली काँग्रेस विराटनगर महानगरपालिकाका सभापति दिपक चापागाँईको अगुवाईमा आठ लाख लागतमा वरगाछी निर्माणको काम अगाडी बढेको छ । चापागाँई वरगाछी चौकवासी हुनुहुन्छ ।
सभापति चापागाँईका अनुसार २।५ मिटरको गोलाकार ब्यास निर्माण गरेर त्यसमाथि पाँच फिट अग्लो वरगाछी राखिने भएको छ । जसमा ट्राफिक लाइटको सुविधा र पानी फोहोराको आकर्षण हुने चापागाँईले जानकारी दिनुभयो । यसका लागि स्रोत समेत स्थानीय आफैंले जुटाउने भएका हुन् ।
वरको रुख भएका कारण वरगाछी नाम भएको उक्त चौकमा पछिल्लो समय लायन्स क्लवले स्तम्भ राखेको थियो । ट्रकले हानेर ढालिदिएपछि स्थानीयले त्यस स्थानको पहिचान फर्काउने किसिमको नयाँ स्तम्भ राख्ने भएका हुन् ।
राजमार्गमा स्तम्भ तथा प्रवेशद्वारा निर्माण गर्दा सडक विभागसँग अनुमति लिनुपर्ने हुन्छ । सडकसँग स्वीकृति नलिईकन बनाएको अवस्थामा जुनसुकै समयमा पनि भत्काउनसक्ने संभावना हुन्छ ।
