विराटनगर । संघीय सरकारले कोरोना संक्रमणको जोखिमबाट बालबालिकालाई सुरक्षित राख्न विद्यालय बन्द गर्ने निर्णय गरेपनि विराटनगर महानगरपालिकाका विद्यालयहरु भने थप चारदिन सञ्चालन हुने भएका छन् । विद्यालयहरुले पूर्वनिर्धारत परीक्षाको कार्यसूची प्रकाशित गरेका कारण महानगरपालिका क्षेत्रका विद्यालयहरु सञ्चालन हुने भएका हुन् ।
सरकारले पुस २७ गतेदेखि माघ १५ गतेसम्म विद्यालय बन्द गर्ने सूचना प्रकाशित गरेको थियो । विराटनगर महानगरपालिकाका शैक्षिक प्रशासन महाशाखाका प्रमुख दुर्गाप्रसाद खतिवडाका अनुसार जिल्लास्थित कोभिड क्राईसिस मेनेजमेन्ट समितिको निर्णयका आधारमा माघ १ गतेपछि विद्यालय बन्द राखिने जानकारी दिनुभयो ।
संघीय सरकारको निर्णय अगाडी नै मोरङको हकमा माघ १ गतेदेखि विद्यालय बन्द राख्ने निर्णय भईसकेको थियो, महाशाखा प्रमुख खतिवडाले भन्नुभयो–त्यसैको आधारमा विराटनगर महानगरपालिका भित्रका विद्यालयको पूर्वनिर्धारित परीक्षा लगायतका कार्यक्रम सम्पन्न गर्न दिइने भएको हो ।
विराटनगरका विद्यालयमा अहिले विद्यार्थीलाई संक्रमण समेत नदेखिएको दावी महाशाखा प्रमुख खतिवडाको छ । संक्रमणको जोखिम सामान्यस्तरमा समेत नदेखिएका कारण परीक्षा सम्पन्न हुँदासम्मको चार दिनलाई विद्यालय सञ्चालन गर्ने स्वीकृति प्रदान गरिएको हो ।
