विराटनगर । सुनसरी बराहक्षेत्रको चतराधाममा बस्ने सिद्धबाबा उर्फ कृष्णबहादुर गिरीविरुद्धको जबरजस्ती करणीको मुद्दामा उच्च अदालत विराटनगरले चैत १५ गतेका लागि अर्को पेशी तोेकेको छ ।
उच्च अदालत विराटनगरले मुद्दाको पेशीमा बुधबार भएको गोलाप्रथामा मुख्य न्यायाधीश तिलप्रसाद श्रेष्ठ र न्यायाधीश तेजनारायण सिंह राईको ३ नम्बर इजलासमा परेको थियो । उक्त इजलाशमा सुनुवाइपछि मुख्य न्यायाधीश श्रेष्ठले ‘म रहितको इजलाशमा पेश गर्नु’ भन्ने आशयको आदेश गरेका थिए ।
न्यायाधीश श्रेष्ठले यसअघि सुनसरी जिल्ला अदालतले ३ लाख रुपैयाँ धरौटीमा छाड्न दिएको आदेशलाई बदर गर्ने फैसला गरेका थिए । दोस्रो पटक सोही मुद्दा हेर्न नमिल्ने उनको आदेशमा उल्लेख रहेको उच्च अदालत विराटनगरका ओमराज सुवेदीले जानकारी दिए ।
उनका अनुसार अब उच्चमा भएका १० जना न्यायाधीशमध्ये ५ जनाले सो मुद्दा हेर्न नमिल्ने भएको छ । सोही मुद्दामा न्यायाधीश प्रेमराज ढकाल र रेणुका साहले नेपाल सरकारले गरेको पुनरावेदनमा दुवै पक्षका झगडिया झिकाउने आदेश दिएका थिए । साह सरुवा भएपनि ढकाल उच्च अदालतमै रहेका छन् ।
यस्तै न्यायाधीश राजन प्रसाद भट्टराईको प्रतिवादीका तर्फबाट बहस गर्ने बरिष्ठ अधिवक्ता रमेश कोइरालाका नातेदार हुन् । उनले पनि सो मुद्दा हेर्न नमिल्ने भएको छ । यस्तै न्यायाधीश कृष्णकमल अधिकारी र जगतनारायण प्रधानले पनि सोही मुद्दामा झगडिया झिकाउने आदेश गरेका थिए ।
उक्त मुद्दा हेर्न मिल्ने न्यायाधीशहरु अब ५ जनामात्रै भएको कारण चैत १५ गतेको सुनुवाई पनि नहुने देखिएको छ । यसका लागि न्यायाधीशहरुको सरुवा नभएसम्म अन्तिम फैसला आउने सम्भावना कम रहेको सुवेदीले बताए ।
सुनसरी जिल्ला अदालतको २०७७ मङ्सिर २२ गतेको फैसलामा सिद्धबाबा भनिने गिरीले बलात्कार गरेको नभइ मिलेमतोमा करणी गरेको आशय उल्लेख छ । सिद्धबाबाकी भक्तजन पीडित २६ वर्षीय महिलाले आफूमाथि बलात्कार नै भएकोले कारबाहीको माग गर्दै जिल्ला अदालत सुनसरीको फैसलाको विरुद्धमा उच्चमा मुद्दा दर्ता गराएकी छिन् ।
गिरीले पनि जिल्ला अदालतको फैसलामा आफ्नो ब्रम्हचार्य तोडिएको फैसला आएको भन्दै त्यस्तो नभएको कारण सफाइको माग गर्दै अर्को मुद्दा दर्ता गराएका छन् । दुवै मुद्दालाई एकै ठाउँमा राखेर अदालतले सुनुवाइ गरिरहेको छ । सम्भवत बुधबार नै फैसला आउने उच्च अदालत स्रोतको भनाइ छ ।
सोलुखुम्बु घर भई सुनसरीको बराहक्षेत्रस्थित पवित्र धार्मिक स्थलमा बस्ने गिरी आफूलाई बाल ब्रह्मचारी भएको दाबी गर्दथे । उनै धर्मगुरुले आफूलाई बलात्कार गरेको भन्दै एक २६ वर्षीय अनुयायीले २०७७ मंसिर ११ गते महानगरीय प्रहरी परिसर काठमाडौंमा उजुरी दर्ता गरेकी थिइन् । कात्तिक ४ गते सिद्धबाबाले आश्रममा बोलाएर आफूलाई मोहित बनाएर बलात्कार गरेको ती महिलाको आरोप छ । त्यस घटनाको विरुद्धमा २०७६ पुस १० गते सिद्धबाबाविरुद्ध जिल्ला अदालत सुनसरीमा मुद्दा दायर भएको थियो भने २०७७ मङ्सिर २२ गते जिल्ला अदालत सुनसरीले फैसला दिएको थियो ।
सुनसरी जिल्ला अदालतका न्यायाधीश अर्जुनप्रसाद कोइरालाले ०७७ साल मङ्सिर २२ गते गरेको फैसलामा सिद्धबाबाले राजीखुशीमै महिलासँग यौनसम्बन्ध राखेको उल्लेख छ । सुनसरी बराहक्षेत्र नगरपालिका–१ चतरा हनुमान मन्दिरस्थित जगत गुरु आश्रममा बस्ने सिद्धबाबा धर्मगुरु हुन् ।
