विराटनगर । विराटनगर–९ हस्पिटल चौकमा मध्यराती १२ः१५ बजे आगलागी हुँदा ५० लाख बराबरको क्षति भएको छ । शोभादेवी घिमिरेको घरबाट सल्केको आगोले आसपासका चारवटा पसल समेत जलेर क्षति पुगेको छ ।
घिमिरेको किराना पसल, विपन राजबंशीको चिया पसल, तुलसीप्रसाद उप्रेतीको कपडा पसल अबान्सु राजबंशीको चिसा पसल जलेर पूर्ण रुपमा क्षति भएको मोरङ प्रहरीका प्रवक्ता प्रहरी नायव उपरीक्षक दिपक श्रेष्ठले जानकारी दिनुभयो ।
विराटनगर महानगरपालिका दुईवटा, दमक र दुहबी नगरपालिकाबाट आएका दुईवटा दमकल, नेपाल प्रहरी, सशस्त्र प्रहरी, नगर प्रहरीले १ः४० बजे आगो नियन्त्रणमा लिइएको थियो ।
त्यस क्रममा ग्यासको सिलिण्डर पड्केर विराटनगर बारुणयन्त्रमा कार्यरत तीनजना कर्मचारी घाइते भएका छन् । प्रहरीका प्रवक्ता श्रेष्ठका अनुसार बारुणयन्त्रमा कार्यरत हवल्दार भिम बिष्ट, फायरमेन अशेष दाहाल र प्रेमकुमार राजबंशी घाइते भएका हुन् । उनीहरुको तत्काल कोसी अस्पताल विराटनगरमा प्राथमिक उपचारपछि म्याक्स अस्पतालमा थप उपचार भईरहेको छ ।
