विराटनगर । जनता समाजवादी पार्टी नेपालका सङ्घीय परिषद् सदस्य उमेश यादवले पार्टी परित्याग गरेको घोषणा गरेका छन् ।
शनिबार विराटनगरमा पत्रकार सम्मेलन गर्दै उनले पार्टीको साधारण सदस्य समेत नरहने गरी पार्टी परित्यागको घोषणा गरेका हुन् । उनले अन्य कुनै पार्टी प्रवेश नगर्ने समेत जानकारी दिए ।
मोरङका प्रभावशाली नेता यादवले विराटनगरमा पार्टीको बलियो अवस्था हुँदा समेत गठबन्धन गरी महानगरपालिकाको प्रमुख पदमा छाडेको बिषयप्रति आपत्ती जनाए । पार्टीले महानगर प्रमुखमा जित्ने अवस्थामा रहँदारहँदै प्रमुख पद छाडेको विरोध स्वरूप पार्टी त्याग गरेको उनले बताए ।
नेता यादवले गठबन्धनबाट कार्यकर्तालाई ठूलो धोका भएको चर्चा गर्दै आईतबार महानगर प्रमुखको पदमा स्वतन्त्र उम्मेदवारी दिने घोषणा समेत गरे । यादव २०७४ सालको निर्वाचनमा जसपाबाट महानगर प्रमुख पदमा उम्मेदवारी दिई तेस्रो स्थान ल्याएका नेता हुन् ।
