विराटनगर । प्रहरीले विराटनगरका विभिन्न स्थानबाट मोटरसाइकल चोरीमा संलग्न आरोपितलाई पक्राउ गरेको छ । पार्किङ गरेर राखेका मोटरसाइकल चोरीमा संलगन चारजनालाई मोरङ प्रहरीले पक्राउ गरेको हो ।
विराटनगर महानगरपालिका–४ स्थित सामुदायिक मेडिकल हल अगाडी तथा नोवेल अस्पताल कम्पाउण्ड भित्र पार्किङ गरी राखेको को ६ प ६८०२ नम्बरको डिस्कभर मोटरसाईकल, प्र १ –०१०–१३ प ४५०७ नम्बर १५० सिसिको पल्सर मोटरसाईकल र नम्बर नखुलेको १५० सिसिको पल्सर मोटरसाईकल चोरी गर्ने गिरोह प्रहरीको नियन्त्रणमा परेको हो ।
पक्राउ पर्नेमा विराटनगर महानगरपालिका ४ का २२ वर्षीय नविन माझी, सुनसरी दुहवी–९ का १८ वर्षीय मोहमद सलाउदिन, ३४ वर्षीय मोहमद नसुरदिन र विराटनगर महानगरपालिका–८ बस्ने २५ वर्षीय मोहमद हजरत छन् । उनीहरुलाई चोरीका मोटरसाईकल सहित जिल्ला प्रहरी कार्यालय मोरङबाट खटिएको प्रहरी टोलीले पक्राउ गरी मोरङ जिल्ला अदालतबाट चोरी कसूरमा पाँचदिनको म्याद थप गरेर अनुसन्धान सुरु गरेको छ ।
