विराटनगर । विराटनगर १६ का एक युवाले १४ वर्षीया बालिकालाई ललाई–फकाई विवाह गरेको आरोपमा मोरङ प्रहरीले नियन्त्रणमा लिएको छ ।
मोरङको बुढीगगा २ की १४ बर्षिया बालिकालाई भगाएको आरोपमा विराटनगर १६ का २१ वर्षीय विक्कु राय प्रहरी नियन्त्रणमा परेका हुन् ।
रायले गत शुक्रबार घरमा कोही नभएको मौका छोपेर बालिकासँग विवाह गरेको मनसायमा भगाएका थिए ।
विवाह गर्ने उमेर नपुगी छोरीलाई भगाएको थाहा पाएपछी किशोरीका आफन्तले जिल्ला प्रहरी कार्यालयमा उजुरी दिएका छन् । पीडित परिवारको उजुरीका आधारमा आरोपितलाई मोरङ प्रहरीले आईतबार दिउँसो घरबाट पक्राउ गरेको थियो । उनीसँगै बालिकालाई समेत प्रहरीले उद्धार गरेको छ ।
कक्षा ९ मा अध्ययनरत बालिकालाई घरमा लगेर रायका परिवारले गुपचुप सिन्दुरपोते गरेका थिए । विवाह गरेको भन्ने विषय केटाका छरछिमेकले समेत थाहा पाएका थिएनन् । आईतबार प्रहरीले केटाका घरमा बालिकाको उद्धार गर्न पुगेपछि मात्रै स्थानीयले थाहा पाएका हुन् ।
कसरी भयो चिनजान
पक्राउ परेका युवा त्यही बालिकाको घर छेउमा रहेको एक गार्मेन्टमा काम गर्दैआएका थिए । काममा गएको बेला उनीसँग बोलचाल हुने गरेको थियो । सामान्य बोलचालसँगै एक आपसमा मोबाईल नम्बर साटासाट गरे । त्यसपछि नियमित बोलचाल र भेटघाट सुरु भयो । चिनजानको सम्बन्ध निजकँदै जाँदा एकले अर्कोबीच विश्वास बढ्यो । त्यहि विश्वासका आधारमा बालिकाले युवाको घर जाने ईच्छा गरेकी थिइन् ।
मोरङ प्रहरीका प्रवत्ता दिपक श्रेष्ठका अनुसार केटीको उमेर १४ बर्ष मात्रै भएका कारण कानुनी प्रकृयामा गएर अनुसन्धान थालिने छ । तर अहिलेसम्म बालिका पक्षले जाहिरी नदिएका कारण कारवाहीको प्रक्रिया अगाडी बढाईएको छैन।
किशोरीकी आमाले केटा पक्ष विरुद्ध जाहिरी दिए भने कारबाही अगाडी बढाईने प्रवक्ता श्रेष्ठको भनाई छ ।
