विराटनगर । पर्यावरण रक्षाका लागि वृक्षरोपण अन्तर्गत आज नेपाल तथा भारतका दुई स्थानमा विभिन्न जातका विरुवा रोपियो ।
एजुकेशन मेसेज मिडिया प्रालि, नेपाल भारत सामाजिक संस्कृतिक मञ्च , नेपाल भारत रेल यात्रु सहजीकरण समिति र जनकपुर वन प्राविधिक समूहद्वारा आज यहाँ आयोजित वृक्षारोपण, अन्तरक्रिया तथा सम्मान कार्यक्रममा रुद्राक्ष, रक्तचन्दन, पिपल र वर लगायतका विभिन्न जातका २०० विरुवा भारतको मीरगञ्ज पुलको तटवन्ध र विराटनगर-१५ स्थित रानी पोखरीमा रोपियो ।
सो अवसरमा मधेश प्रदेशका उद्योग, पर्यटन तथा वनमन्त्रालयका सचिव विशाल घिमिरेले जहाँ हरियाली त्यहाँ खुशियालीलाई निरन्तरता दिन सबैले आफ्नो घरजमीनमा वृक्षरोपण गर्न आग्रह गर्नु भयो ।
नेपाल भारत सामाजिक सांस्कृतिक मञ्चका अध्यक्ष राजेशकुमार शर्मा, रणभूमि अनलाईका पवन साह, रुपमती नदी संरक्षण समिति जनकपुरका सुदिप मण्डल,सुरेश शर्मा,समवेदना संस्था भारतका डा सुस्मिता ठाकुर लगायतले मानिसलाई स्वस्थ जीवनयापनका लागि आवश्यक स्वच्छ हावाका लागि प्रत्येक चाडपर्व एवं उत्सवमा एक-एक विरुवा रोपि हरियाली बनाउन आग्रह गर्नु भयो । वेवारिश शवलाई उचित दाहसंस्कार गर्ने भारत फारविशगञ्जका समवेदना संस्थाका सदस्यहरुलाई सोही अवसरमा सम्मान गरिएको थियो ।
यस्तै विराटनगरमा कोभिड महामारीमा नागरिकलाई स्वास्थ्य उपचार र खाद्यान्न सहयोग गर्ने अमृत साह गणेश साह, महेश सोनीलाइ समेत सम्मान गरिएको थियो ।
