विराटनगर। क्रोएसिया पठाइदिन्छु भनी रकम ठगी गरेको आरोपमा विराटनगर–१६ का २६ वर्षीय युवक उत्सव दाहाललाई प्रहरीले पक्राउ गरेको छ । हाल काठमाडौं–१० बानेश्वर बस्दै आएका उनलाई काठमाडौं उपत्यका अपराध अनुसन्धान कार्यालयको टोलीले सिनामंगलबाट पक्राउ गरेको हो ।
वैदेशिक रोजगारीका लागि क्रोएसिया पठाइदिन्छ भनी उनले पीडितबाट ६ लाख २४ हजार ठगी गरेको आरोप छ । उनीमाथि थप अनुसन्धान तथा कारबाहीका लागि वैदेशिक रोजगारी विभाग बुद्धनगर पठाइएको प्रहरीले जनाएको छ ।
