विराटनगर । एक व्यक्तिको ज्यान जाने गरि दुर्घटना गराएको सवारी र चालकको पहिचान गर्न जिल्ला ट्राफिक प्रहरी कार्यालय मोरङको टोलि दशैंभर जिल्ला दौडाहामा लागेको छ । हुलियाका आधारमा चालक र सवारी नम्बर पत्ता लगाउनु पर्ने अवस्था आएपछि असोज १८ गतेदेखि यता दैनिक जसो जिल्लाका सबै क्षेत्रमा पुग्नुपर्ने बाध्यता आईपरेको हो ।
असोज १९ गते नवमीको दिन मोरङको ग्रामथान गाउँपालिका–५ का ४२ वर्षीय सगरलाल माझीको दुर्घटनामा मृत्यु भएको थियो । दुर्घटनापछि चालक र सवारीको अहिलेसम्म पहिचान खुल्न सकेको छैन ।
‘दशैं नै तनावमा बितेको छ’ जिल्ला ट्राफिक प्रहरी कार्यालय मोरङका प्रमुख राजकुमार कार्कीले भने–हुलियाका आधारमा चालक र सवारी खोजिरहेका छौं । उनले केहि तथ्यका आधारमा नजिक पुगेपनि अहिले नै यकिन गर्न सक्ने अवस्था नभएकोले पर्ख र हेरको अवस्थामा रहेको बताए ।
