विराटनगर । गुरुङ समुदायले पुरानो वर्षलाई बिदाई गरी नयाँ वर्षलाई स्वागत गरेर शुक्रबार ‘तमु ल्होसार’ पर्व मनाएका छन् ।
‘ल्हो’ को अर्थ वर्ष र ‘सार’ को अर्थ फेरिनु भएकाले वर्ष फेरिने दिनलाई ‘तमु ल्होसार’ भनिएको हो । तमु ल्होसारलाई गुरुङ समुदायले नयाँ वर्षका रूपमा भव्यरूपमा मनाउदै आएका छन् ।
यसै अवसरमा तमु ह्यूला छोज धीं महानगर कमिटिले विराटनगरमा विविध कार्यक्रम गरी यस पटकको तमु ल्होसार पर्व मनाएको छ ।
तमु ल्होसारको अवसरमा गुरुङ समुदायले भगवान बुद्धको पुजाआज गर्नुका साथै इष्टमित्र आफ्न्तसंग भेंटघाट गरी शुभकामना आदानप्रदान गर्नुका साथै नाचगान गरेर मनोरंजन गरेका थिए । कार्यक्रममा गुरुङ समुदायका अगुवा अर्मत गुरुङ, जङ्ग बहादुर गुरुङ, कविमान गुरुङ , राजेश गुरुङ लगायतले पर्वको अवसरमा शुभकामना व्यक्त गरेका थिए ।
पुस १५ गतेको रात सबैभन्दा लामो हुने र यसपछिका रात घट्दै जाने भएकाले पनि यस पर्वको महत्व रहेको बताइन्छ । तमु ल्होसारका अवसरमा आज सरकारले सार्वजनिक बिदा दिएको थियो । कार्यक्रममा गुरुङ समुदायका मानिस परम्परागत एवं सांस्कृतिक वेशभूषामा सजिएर सहभागी भएका थिए ।
तस्वीर : प्रेम देवान /आवर विराटनगर
