विराटनगर । प्रदेश १ मा एमालेका पुराना नेताहरु प्रदेश प्रमुखको अपेक्षासहित दौडमा छन् ।
पछिल्लो समय संघमा फेरिएको राजनीतिक समिकरणसँगै प्रदेश १ मा पनि सोही अनुरुप नेताहरुको लविङ सुरु गरेका छन् ।
प्रदेश प्रमुखसमेत परिवर्तन गर्नेगरी सत्तारुढ गठबन्धनले तयारी गरेको छ । प्रदेश १ का पुराना नेता गोपाल गुरागाईं र इन्द्रजीत राईसमेतले प्रदेश प्रमुखमा इच्छा व्यक्त गरेका छन् ।
२०४८ सालको निर्वाचनमा सूर्यबहादुर थापालाई धनकुटाबाट हराएर चर्चामा आएका गोपाल गुरागाईं प्रदेश १ का पुराना नेता हुन् । चुनाव लड्न नसक्ने बताउदै उनले आफूलाई मिल्दोजुल्दो जिम्मेवारी आए लिन इच्छुक रहेको बताउछन् ।
त्यस्तै सैन्य विज्ञ हुँदै नेकपा माओवादीले संविधानसभा सदस्यसमेत बनाएको भोजपुरका इन्द्रजित राई पनि प्रदेश प्रमुख हुन इच्छा व्यक्त गरेको एमाले स्रोतले जनाएको छ । उनी पछिल्लो समय एमालेमा प्रवेश गरेका माओवादी नेता रामबहादुर थापा (बादल)सँगै एमालेमा आएका हुन् । ७ वटा प्रदेशमा अहिले जसपा, नेकपा माओवादी, काँग्रेस र नेकपा एकीकृत समाजवादीको भागबण्डामा प्रदेश प्रमुख छन् ।
गठबन्धन फेरिएसँगै एमालेले प्रदेश प्रमुख पनि फेरबदल चाहेको छ ।
