विराटनगर । विराटनगरको ट्राफिक व्यवस्थापनलाई सहज बनाउन मुख्य राजमार्ग र बजार क्षेत्रका आठ स्थानमा ट्राफिक लाईट जडान गरिने भएको छ ।
विराटनगरको रोडशेषचौकदेखि राजबंशी चौकसम्मको क्षेत्रमा पाँच स्थानमा ट्राफिक लाइट जडान गर्ने प्रक्रिया अगाडी बढेको छ । छ लेन सडक आयोजना ईटहरीले ट्राफिक लाइट जडानको प्रक्रिया अगाडी बढाईसकेको हो ।
यसैगरी बजार क्षेत्रको ट्राफिकचौकदेखि तीनपैनीसम्म तीनस्थानमा विराटनगर महानगरपालिकाले ट्राफिक लाइट जडान गर्ने तयारी गरेको छ । जिल्ला ट्राफिक प्रहरी कार्यालय मोरङका प्रमुख राजकुमार कार्कीका अनुसार छलेन सडक आयोजनाले मुख्य राजमार्ग अन्तर्गत रोडशेष, घाँसचौक, बरगाछी, कन्चनबारी र राजबंशी चौकमा ट्राफिक लाइट जडान गर्ने प्रक्रिया अगाडी बढाईसकेको छ ।
महानगरले जलजलाचौक र तीनपैनी र अर्को एक स्थानमा ट्राफिकलाइट जडान गर्ने तयारी गरिरहेको छ । दुई स्थानमा जडान गर्ने निश्चित भएपनि अर्को एक स्थान ट्राफिक चौक वा अस्पताल चौक भन्ने यकिन हुन सकेको छैन ।
तत्कालको आवश्यकता ट्राफिक चौक भएकोले प्राथमिकतामा राख्नुपर्ने माग गरिएको ट्राफिक प्रमुख कार्कीले बताए ।
