विराटनगर । विराट गोल्डकपको सेमिफाइनलका खेलहरु आजदेखि सुरु हुदैछ ।
विराटनगरको सहिद मैदानमा रात्रिकालीन गोल्डकपमा आज घरेलु टिम विराटनगर सिटी एफसी र जावलाखेल यूथ क्लबबीचको खेल ६:४५ बजेदेखि सुरु हुनेछ ।
विराट गोल्ड कप फुटबल ट्रस्टको आयोजनामा सातौँ संस्करणमा पहिलो पटक जावालाखेल गोल्डकप खेल्न विराटनगर आएको हो । ए डिभिजन लिग खेल्दै आएको जावलाखेललाई पहिलो पटक मोफसलको सर्वाधिक पुरस्कार राशिको प्रतियोगिता विराट गोल्ड कप खेल्न भित्र्याइएको हो ।
बिहीबार भएको उद्घाटन खेलमा नेपाल प्रहरीलाई १–० गोलले हराउँदै घरेलु टिम विराटनगर सिटी एफसी अन्तिम चारमा पुगेको थियो। भने
विभागीय टिम त्रिभूवन आर्मीलाई सडनडेथमा ६-५ गोलले पन्छाउँदै जावालाखेल अन्तिम चारको स्थान सुरक्षित गरेको थियो ।
आज विराटनगर सिटी र जावालाखेल फाइनल प्रवेशका लागि खेल्दै छन्।
भोलि हुने दोस्रो सेमिफाइनलको खेल सशस्त्र प्रहरी बल (एपीएफ) र लुका सकर क्लब केरलाबीच हुनेछ।
आगामी चैत १६ गतेसम्म सञ्चालन हुने प्रतियोगितामा स्वदेशी र विदेशीसहित ८ टिमको सहभागिता रहेको छ । प्रतियोगितामा तीन विभागिय टिमहरु एपीएफ, त्रिभुवन आर्मी र नेपाल पुलिस क्लब, संकटा, जावालाखेल र आयोजक विराटनगर सिटी एफसी, भारत केरलाको लुका सकर, भुटानको ड्रुक लयुल फुटबल क्लबले सहभागिता जनाएका छन् ।
यस वर्षको बिजेता टिमले २० लाख १५ हजार नगद र उप–विजेताले १० लाख २५ हजार प्राप्त गर्नेछ । यसैगरी विधागत रुपमा उत्कृष्ट खेलाडीले नगद २५ हजार पाउने छन् । प्लेयर अफ द म्याचलाई ११ हजार पुरस्कार दिईने छ ।
प्रतियोगितामा सहभागी हुने दर्शकले टिकट खरिद खुल्ला गरिसकिएको छ । टिकेटिङ्ग पार्टनर खल्ती एपसँग सम्झौता गरिएको छ । आयोजकले सेमिफाइनल खेलको टिकट दर परिमार्जन गरेर ५०० बाट ३०० रुपैँया कायम गरेको छ । विराट गोल्डकपका सह–संयोजक शुभासिश कोइरालाले दर्शकहरुको माग अनुसार टिकट दर घटाइएको जानकारी दिएका हुन् । प्रतियोगिता आयोजना गर्न २ करोड ५० लाख खर्च अनुमान गरिएको छ ।
विराटनगरमा २०१८ सालदेखि हुँदै आएको महेन्द्र गोल्डकपको रुपान्तरिक संस्करण विराट गोल्डकप २०५७ सालदेखि सुरु भएको हो । विराट गोल्डकपको यो सातौं संस्करण हो ।
