विराटनगर । कोशी प्रदेश सरकारले मनमोहन प्राविधिक विश्वविद्यालय भौतिक पूर्वाधार निर्माणका लागि द्विपक्षीय समझदारी अनुसार तय हुनेगरि आर्थिक सहयोग उपलब्ध गराउन भारत सरकार समक्ष अनुरोध गर्ने निर्णय गरेको छ ।
आज (बुधबार) बसेको कोशी प्रदेश सरकार मन्त्रीपरिषदको बैठकले यस्तो निर्णय गरेको हो ।
यस्तै प्रदेश आर्थिक कार्यविधि तथा वित्तीय उत्तरदायित्व नियमवली २०७९ स्वीकृत गर्ने र प्रदेश आर्थिक कार्यविधि तथा वित्तीय उत्तरदायित्व नियमवली २०७५ खारेज गर्ने निर्णय भएको उद्योग,कृषि तथा सहकारीमन्त्री भक्तिप्रसाद सिटौलाले जानकारी दिए ।
मनमोहन प्राविधिक विश्वविद्यालयका लागि द्विपक्षीय समझदारी अनुसार तय हुनेगरि विभिन्न विषयका विज्ञ र दक्ष प्राविधिक प्रशिक्षक उपलब्ध गराउन भारत सरकार समक्ष अनुरोध गर्ने निर्णय भएको मन्त्री सिटौलाले बताए ।
पछिल्लो समय बढ्दो कोरोना भाइरस प्रकोपको सतर्कताका लागि आवश्यक पहलका लागि स्वास्थ्य मन्त्रालयलाई निर्देशन दिने समेत निर्णय भएको मन्त्री सिटौलाले जानकारी दिए ।
