विराटनगर । विराटनगरमा पहिचानको आधारमा प्रदेशको पुन: नामाकरण माग गर्दै आन्दोलनरत पक्ष र प्रहरीबीच झडप हुँदा ६ जना घाइते भएका छन् ।
कोशी नाम खारेजको माग गर्दै आन्दोलन गर्ने क्रममा घाइते भइ मृत्युवरण गर्न पुगेका पदम लिम्बू (लाजेहाङ)को शव प्रदर्शन गर्ने क्रममा विराटनगरको रोडशेषमा झडप हुँदा तीनजना घाइते भएका हुन् ।
घाइते हुनेमा इटहरी -२ का ३० वर्षीय डेनिज राई, झापा शिवसताक्षीका ४३ वर्षीय राजकुमार शेर्मा, विराटनगर -८ का ४२ वर्षीय चन्द्रकुमार राई , इटहरी की२६ वर्षीय दया कुमारी राई, किरात याक्थङ चुम्लुङका केन्द्रिय अध्यक्ष प्रेम याक्तेङ र ४५ वर्षीय देवान राई किरात राई यायोख्खाको उपाध्यक्ष रहेका छन् ।
विराटनगरका राईलाई प्रहरीको गोलि लाग्दा एकजनाको खुट्टामा चोट लागेको छ भने अन्य पाँच जनाको अश्रुग्यासको प्रहारबाट हात र खुट्टामा चोट लागेको किरात राई यायोख्खाका सचीव कुन्ता राईले जानकारी दिइन् ।
उनका अनुसार ६ जना घाईतेको विराटनगरस्थित पारस अस्पतालमा उपचार भईरहेको छ ।
पहिचान पक्षधरले कोशी नाम खारेजको माग गर्दै गत चैत ५ गते विराटनगरमा प्रदर्शन हुँदा प्रहरी र आन्दोलनकारीबीच झडप भएको थियो। उक्त झडपमा लाजेहाङ घाइते भएका थिए।
घाइते भएका लाजेहाङको विपी कोइराला स्वास्थ्य विज्ञान प्रतिष्ठानमा उपचारका क्रममा चैत १० गते मृत्यु भएको थियो।
लाजेहाङको अन्त्येष्टि गर्नुअघि धरानमा, इटहरी, विराटनगरको रोडशेष चोकमा श्रद्धाञ्जली अर्पण तथा श्रद्धाञ्जली सभा गर्ने र कोशी प्रदेशसभा परिक्रमा गराउने उनीहरुको कार्यक्रम थियो। सोही क्रममा झडप भएको हो।
