विराटनगर । विराटनगर–४ तित्रीगाछीमा एक बृद्धाले पेट्रोल छर्केर आत्मादाह प्रयास गरेका छन् । मोरङको लेटाङ नगरपालिका–७ स्थायी ठेगाना उल्लेख भई हेटौडा बस्दै आएका ६५ वर्षीय गोबिन्दप्रसाद नेपालले बिहीबार आत्मादाह प्रयास गरेका हुन् ।
उनका आफन्त विराटनगरमा समेत बसोबास गर्दै आएका छन् । मोरङका प्रहरी नायव उपरीक्षक एवं प्रवक्ता रन्जनकुमार दाहालका अनुसार आगो लागेको देखिएपछि स्थानीयले निभाएका थिए । उनको शरिर जलेको अवस्थामा प्रहरीले उद्धार गरेर अस्पताल भर्ना गरेको थियो । हाल उनको रेड अस्पताल एण्ड ट्रमा सेन्टरमा उपचार भईरहेको छ । प्रहरी प्रवक्ता दाहालका अनुसार गम्भीर अवस्थामा उनको उद्धार गरिएको थियो ।
प्रहरीले घटनाको परिबेसबारे अनुसन्धान सुरु गरेको छ । प्रवक्ता दाहालका अनुसार उनका परिवार विराटनगरमा बस्दै आएको र उनी हेटौडामा थिए । तर, उनले लगानी गरेको पैसा उठाउन आएको बेला आत्मदाह प्रयास गरेका छन् । पैसा नउठेर बिरत्तिएका उनी आत्मदाह प्रयास गरेको भन्ने प्रारम्भिक सूचनाहरु प्रहरीले प्राप्त गरेको छ ।
