एक समयका नेपाली राष्ट्रिय टिमको एक भरोसावान मिडफिल्डर भोला सिलवालले व्यवसायिक खेल जीवनबाट सन्यास लिएका छन् । झण्डै २ दशक नेपाल पुलिसबाट व्यवासयिक फुटबल खेलेका सिलवालले शुरुमा विराटनगरको मोतिराम स्पोर्टिङ क्लबबाट व्यावसायिक फुटबल करिअर सुरु गरे । त्यसपछि सम्राट स्पोर्टिङ क्लब हुँदै २०६० सालमा काठमाडौंको सी- डिभिजनको क्लब सामाजिक युथ क्लबबाट खेल्न थाले ।
उनको जीवनको टर्निङ प्वाइन्ट भने २०६१ सालमा काठमाडौँमा भएको सनमुन कपबाट भएको हो । काठमाडौंको नेपाल पुलिसको तालिम केन्द्रको खेलमैदानमा भएको सनमुन कपमा उनले पूर्वाञ्चल टिमबाट खेलेका थिए । त्यही समयमा नेपाल पुलिसमा खेलाडी मागिएको थियो । उनी पनि गए र छनोट पनि भए । उनेले २०६२ बैशाखमा नेपाल पुलिसबाट डेब्यु गरे । नेपाल पुलिस क्लबबाट खेल खेल्न शुरु गरेपछि तथा खेलमा राम्रो सुधार भएपछि उनलाई राष्ट्रिय टिममा बोलाइएको थियो । उनी पछि नेपालको राष्ट्रिय टोलीका मिडफिल्डर बने । एक भरोसावान् खेलाडीका रुपमा अन्तर्राष्ट्रिय प्रतियोगितामा उनले राम्रै भूमिका निभाए । नेपालको राष्ट्रिय टिमबाट उनले सन् २००८ मा उत्तर कोरिया विरुद्धको खेलमा डेब्यु गरे ।
त्यसपछि उनले राष्ट्रिय टोलीबाट बंगलादेश विरुद्धको खेलमा तथा इस्टटिमोर विरुद्धको खेलमा एक-एक गोल गरेका थिए । उनी खेल्न थाले पछि नेपाल पुलिसले ३ पटक सहिद स्मारक लिग जित्यो । त्यो समय पुलिसमा नेपालका चर्चित खेलाडी हरि खड्का र भोला संगै अवकाश लिएका जुमानु राई पनि थिए । नेपाल पुलिसले २०६३, ०६७ र २०६८ को सहिद स्मारक लिग जितेको थियो । २०६८ सालमा भएको राष्ट्रिय लिगमा पनि नेपाल पुलिसले उपाधि जितेको थियो । नेपाल पुलिसबाट खेल्दा उनले नेपालमा भएका धेरै गोल्डकपको उपाधि हात परेका थिए । सहिद स्मारक ए डिभिजन लिगमा पुलिसको अन्तिम खेलमा पुलिसले च्यासल मैदानमा सातदोबाटो युथ क्लबलाई शुक्रबार १–० ले हराएसँगै तेस्रो स्थानमा यसपटक लिगको अन्त्य गरेको छ ।
उपाधि विजेता चर्च ब्वाइज युनाइटेड क्लबले ४८ र दोस्रो स्थानको मछिन्द्र क्लबले ४२ अंक जोड्दा पुलिसको खातामा ४१ अंक रहेको छ । सहिद स्मारक ए डिभिजन लिगमा पुलिसको अन्तिम खेल सँगै जुमानु र आफूले सन्यास लिएको भोलाले बताए । पुलिसले लिग उपाधिमा ह्याट्रिक गर्दाका महत्वपूर्ण सदस्य रहेका जुमानु र भोलाले फुटबलबाटसँगै अलग हुने निर्णय गरेका छन् । पुलिसले विराटकृष्ण श्रेष्ठको प्रशिक्षणमा २०६३, २०६६/६७ र २०६८ मा लिग जित्दै ह्याट्रिक गरेको थियो । कुनै समय दुवै राष्ट्रिय फुटबलका पनि महत्वपूर्ण सदस्य थिए । यसपटक लिगमा ३ खेल मात्र खेलेका भोलाले पनि प्रशिक्षणमै जुट्ने योजना रहेको सुनाए । ‘ झण्डै १९ वर्ष पुलिसबाट खेले । मलाई भोला सिलवाल भनेर पुलिसले नै चिनाएको हो । यदि म पुलिसमा हुने थिएन भने गुमनाम हुन सक्थे,’ भोलाले भने,‘ मलाई क्लबले मौका दियो र मैले पनि आफ्नोतर्फबाट हर सम्भव दिने प्रयास गरे । आफ्नो खेल जीवनबाट म खुसी छु । अब क्लबकै प्रशिक्षण टोलीमा बसेर काम गर्ने इच्छा छ । ’ सन् २००८ देखि २०१६ सम्म राष्ट्रिय टोलीबाट खेलेका भोलाले २ गोल गरेका थिए ।
