विराटनगर । साउथ एशियन स्कुलअफ होटल म्यानेजमेन्ट (सास्थम) ले ४ बर्ष सम्म अध्ययन गरेका विएचएम र विविए तर्फका विद्यार्थीलाई एक कार्यक्रम विच विदाई गरेको छ ।
कलेजले बुधबार होटल रत्नामा विदाई कार्यक्रमको आयोजना गरी बिएचएमतर्फ ७० र विविए तर्फ ४० विद्यार्थीको विदाई गरेको हो ।
विदाई कार्यक्रममा विद्यार्थीले आफुले अध्ययनको ४ बर्षको दौरानमा कलेजका तितामिठा अनुभवहरु कार्यक्रममा सहभागीमाझ सुनाएका थिए । विद्यार्थीहरुले खुशीका पलसँगसँगै भावुक भई आफुले सिकेका ज्ञानका कुराहरु सेयर गरेका थिए ।
विद्यार्थी देवेन्द्र यादवले ३ बर्ष पठनपाठन छाडेकोमा सास्थम आई पुनः अध्ययन शुरू गरेको स्मरण गर्दै उच्च शिक्षा हासिल गर्ने प्रण गरे । यस्तै अर्चना खवास, मौसम झा, रूपाकुमारी मेहताले सास्थमले आफूलाई अगाडिको मार्ग प्रशस्त गर्ने सपना देख्न सक्ने लायकको बनाएको बताए ।
विदाई भएर जाने विद्यार्थीलाई मायाको चिनो प्रदान गरिएको थियो भने विभिन्न विधामा उत्कृष्ट विद्यार्थीलाई पुरस्कृत गरिएको थियो । कार्यक्रममा बोल्दै पूर्वाञ्चल विश्व विद्यालयका परीक्षा नियन्त्रक वालेन्दु हमाल, सास्थमका प्राचार्य देवराज श्रेष्ठ, क्याम्पस म्यानेजर महेश्वरप्रसाद सिंहले विदाई भएर जाने विद्यार्थीहरुको उज्जवल भविवष्यको कामना समेत गरेका थिए ।
कार्यक्रममा विद्यार्थीद्वारा सांस्कृतिक कार्यक्रम पनि प्रस्तुत गरिएको थियो । विद्यार्थीहरुले गीत, नृत्य लगायत उपस्थितहरुलाई मनोरन्जन प्रदान गरेका थिए । सन् २००२ सालमा स्थापना भएको सास्थमले छोटो समयमा नै अध्ययन अध्यापनको क्षेत्रमा चर्चा बटुल्न सफल भएको छ ।
