विराटनगर । साउन महिनाको पूर्वसन्ध्यामा यतिबेला विराटनगरको बजारमा चुरा, पोते र मेहेन्दी किन्नेको घुँइचो छ ।
विराटनगरको मुख्य बजार होस् या भित्री दोकानहरुमा महिला दिदीबहिनीलाई हरियो चुरा, हरियो पोते, पेलो पोते, मेहन्दी खरिद गर्न भ्याइ नभ्याइ छ ।
साउन महिनामा हरियो चुरा, हरियो पोते, मेहन्दी र हरियो साडीहरु एकले अर्कालाई उपहार दिने चलन पनि रहेको छ । त्यसैले पनि अन्य समयमा भन्दा साउन महिनामा यी सामानहरुको खरीद-बिक्री पनि बढेको व्यापारीहरु बताउँछन् ।
हातभरि रंग मिश्रित चुरा, विभिन्न आकारले भरीएको मेहेन्दी विवाहीत महिलाहरुको गलामा हरीयो पोते र साउन महिनाको अन्तर सम्बन्ध विशेष छ ।
यो महिनामा साना बालिकादेखि वृद्धसम्मको हातभरी हरीयो चुरा र मेहेन्दी देख्न सकिन्छ ।
विवाहित महिलाले साउनमा हरियो चुरा हातमा मेहन्दी लगाउनाले श्रीमानको आयु बढ्ने र अविवाहिता महिलाले लगाए मनले चिताएको पूरा हुने धार्मीक विश्वास पनि रहिआएको छ।
एकातिर साउन महिनासँग हरीयो चुरा र मेहेन्दीको धार्मीक, सांस्कृतिक महत्व जोडिएको छ भने अर्को तिर नयाँ पुस्तामा यो फेसन बनेको छ।
साउन महिना सुरु भएसँगै बजारमा हरीयो चुरा,पोते र मेहेन्दीको रौनक यस्तो देखिएको छ।
