विराटनगर । नेकपा (एमाले) कोशी प्रदेश अधिवेशनबाट नयाँ नेतृत्व चयनका लागि भएको मतदानको मतगणना जारी छ । आधिकारिक रुपमा भर्खरै आएको मतपरिणाममा अध्यक्ष घनश्याम खतिवडा प्यानल अगाडि देखिएको छ ।
निर्वाचन कमिटीका अनुसार हालसम्म २८२ मत गणना भएको छ । जसमा अध्यक्षका प्रत्याशी खतिवडाले १४९ मत प्राप्त गरेका छन् । उनका प्रतिस्पर्धी विनोद ढकालले १३१ मत प्राप्त गरेका छन् । उपाध्यक्षमा टिकारा चेमजोङ निर्विरोध निर्वाचित भइसकेका छन् ।
यस्तै सचिवमा राजकुमार भण्डारीले १६१ मत प्राप्त गर्दा उनका प्रतिस्पर्धी शैलेस लामाले १११ मत पाएका छन् । उपसचिवमा जलवर्षा राजवंशीले १८२ मत प्राप्त गरेकी छिन् भने देवान राईले १७५ तथा खेम नेपालीले ११८ मत पाएका छन् ।
सचिवका उम्मेद्वार शैलेस लामा र उपसचिव नेपाली ढकाल पक्षका हुन भने सचिव भण्डारी र उपसचिव दोय राजवंशी र राई खतिवडा प्यानलका हुन् ।२१५ सदस्यीय कमिटीका लागि हिंजो राती मतदान भएको थियो । आज बिहान ५ बजे सम्पन्न मतदान आजै साँझ ५ बजेदेखि सुरु भएको हो । ९९७ जना मतदाता रहेकोमा ९७७ मत खसेको छ ।
