विराटनगर । जिल्ला प्रशासन कार्यालय मोरङका कर्मचारी र विराटनगर महानगरपालिका एकजना जनप्रतिनिधिबीच कार्यालय परिसरमै हात हालाहाल भएको छ । विराटनगर–१ बाट निर्वाचित वडा सदस्य लक्ष्मी राई र नागकिरता फाँटका नायब शुब्बा डिल्ली बस्नेतबीच विवाद उत्पन्न हुँदा हात हालाहालको अवस्था सिर्जना भएको हो ।
नागरिकताको सनाखतका लागि आएको बखत कर्मचारीले चासो नदिएको भन्दै भित्र प्रवेश गरेर नाशु बस्नेतलाई ढाडमा हिर्काएको आरोप प्रशासन कार्यालयको छ । तर, सेवाग्राहीको काम गर्न आउँदा आफू सनाखतका लागि आएको भन्दै कार्ड देखाउँदा समेत हप्कीदप्की गर्दै कार्ड खोसेर बस्नेतले हिर्काएर प्रहरीलाई पक्राउ गराएको महानगरपालिकातर्फबाट दावी छ ।
मोरङका सहायक प्रमुख जिल्ला अधिकारी प्रदिपकुमार साहले पहिले कर्मचारीमाथि हातपात भएपछि विवाद उत्पन्न भएको दावी गरेका छन् । सेवाग्राहीहरुले समेत पहिले वडा सदस्यले हातपात गरेको बताएको सहायक प्रमुख जिल्ला अधिकारी साहको दावी छ ।
विराटनगरका प्रेस संयोजक मिनकुमार नवोदितले कर्मचारीहरुले जनप्रतिनिधिमाथि हातपात मात्रै नभई मेयर नागेश कोइराला र उपमेयर शिल्पा निराला कार्की प्रमुख जिल्ला अधिकारीको कार्यकक्षमा पुग्दा रेस्पोन्स समेत नपाएको दावी गरेका छन् । उनका अनुसार दिउँसो १ बजे भएको घटनापछि जनप्रतिनिधिलाई प्रहरी लगाएर पक्राएको विषयमा छलफल गर्न जिल्ला प्रशासनमा मेयर र उपमेयरसहित वडा अध्यक्षहरु त्यहाँ पुगेका थिए ।
प्रमुख जिल्ला अधिकारी यादवको कार्यकक्षमा अर्का कर्मचारी सुमन निरौलाले मुखमा पानको बुझो चपाउँदै घाउजाँच गर्नुपर्ने भन्दै हप्काउन खोजेपछि कोइराला र कार्की उठेर जिल्ला प्रहरी कार्यालयमा पुगेका थिए । त्यहाँ प्रमुख जिल्ला अधिकारी समेतको उपस्थितिमा अहिले छलफल भईरहेको छ । सहायक प्रमुख जिल्ला अधिकारी साहले सेवाप्रवाहका क्रममा सबै सेवाग्राही समान हुने भएकोले कहिलेकाँहि धैर्यता गुमाउँदा समस्या उत्पन्न परिस्थिति मात्रै भएकोले छलफलबाट निष्कर्ष निकालिने बताए ।
