इन्दु साह
विराटनगर । विराटनगर–११ मा स्वागत मार्ग कालोपत्रे गरिएको भोलिपल्टै उक्किएपछि ठेकेदार कम्पनीलाई पुनःमर्मत गर्न निर्देशन दिइएको छ । महानगरपालिकाका भित्रका धेरै सडकहरु कालोपत्रे गर्ने काम सुरु भएको छ । तर, गुणस्तरको काम नभएको स्थानीयले गुनासो गर्न थालेपछि त्यसको निगरानीमा समेत महानगरपालिकाले चासो बढाएको हो ।
स्वागत मार्गमा लापर्वाहीपूर्ण काम भएको भन्दै ठेकेदार कम्पनी तुलसा कन्ट्रक्सनको भुक्तानी रोक्नुपर्ने माग स्थानीयले गरेका थिए । स्थानीयले आवाज उठाएपछि महानगरपालिकाका योजना प्रमुख एवं इन्जिनियर अर्जुन थापाले सडक कालोपत्रको अवस्था बुझेर पुनः मर्मत गर्न निर्देशन गरेका हुन् ।
वडा अध्यक्ष तिर्थेन्द्र न्यौपानेले मर्मत नगर्दासम्म ठेकेदार कम्पनीको रकम भुक्तानी नगरिने दावी गरेका छन् । कम्पनीले पञ्चमुखी चौक र स्वागत मार्गमा मूल्य अभिबृद्धि (भ्याट)सहित चालिस लाख रुपैँयामा ठेक्का सम्झौता गरेको थियो ।
