विराटनगर । विराटनगरमा बैंकबाट निकालिएको एकलाख रुपैँयाको बण्डलमा एकथान (एक हजारको नोट) नक्कली भेटिएको छ । विराटनगरको स्ट्याण्डर चार्टर बैंक महेन्द्रचौक शाखाबाट चेक साटेर ग्लोबल आईएमई बैंकमा जम्मा गर्न जाँदा एउटा नक्कली नोट भेटिएको हो ।
विराटनगर–६ का प्रविन भट्टराईले स्टयाण्डर चार्टर बैंकमा चेक साटेर ट्राफिक चौकको ग्लोबल आईएमई बैंकमा नगद जम्मा गरेका हुन् । बण्डलमा रहेका नोटमध्ये एउटा नक्कली फेला परेको ग्लोबल आईएमई बैंकले भट्टराईलाई जानकारी दिएको थियो । त्यसपछि भट्टराई चेक साटेको स्टयाण्डर चार्टर बैंक फर्केर जानकारी गराएका थिए ।
‘मैले जानकारी गराउँदा स्टयाण्डर चार्टर बैंकले आफ्नो जिम्मेवारी नहुने जवाफ दियो’ भट्टराईले भने–बैंकबाट चेक साटेर बैंकमै नगद जम्मा गर्न जाँदा भेटिएको त्रुटी समेत सच्याउन मानेन । भेटिएको नक्कली नोट ग्लोबल आईएमई बैंकले राखेको भट्टराईले दावी गरे ।
