विराटनगर । विराटनगरमा जारी कोशी प्रदेश ट्रफी पेप्सी नेशनल टी–२० क्रिकेट प्रतियोगितामा सुदूरपश्चिम प्रदेश र आर्मी विजयी भएका छन् ।
मोरङ क्रिकेट संघको आयोजनामा विराटनगरको बैजनाथपुर क्रिकेट रंगशालामा शुक्रबार भएको पहिलो खेलमा सुदूरपश्चिम प्रदेशले विभागिय टोली नेपाल पुलिसलाई ५२ रनले पराजित गरेको छ ।
जितसँगै सुदूरपश्चिम ३ खेलमा २ मा जित र १ मा पराजित हुँदै ४ अंकको साथ दोस्रो स्थानमा उक्लिएको छ । टस जितेर ब्याटिङ गरेको सुदुरले नारायण जोशीको विस्फोटन ब्याटिङमा निर्धारित २० ओभरमा ८ विकेट गुमाएर १ सय ८३ रनको स्कोर खडा गरेको थियो ।
सुदूपश्चिमका लागि अविशेक पालले ३९ बलमा २ छक्का र ७ चौका प्रहार गरी ५८ रन बनाए । प्लेयर अफ द म्याच नारायण जोशीले विस्फोटक ब्याटिङ गर्दै १२ बलमा ६ छक्काको मद्दतमा ४० रन र किरण ठगुन्नाले ३० रनको योगदान दिए ।
पुलिसका शरद भेश्वाकरले ४ ओभरमा १ मेडन राख्दै ३ विकेट लिँदा मन्जित श्रेष्ठले २ विकेट लिए ।
जवाफमा १ सय ८४ रनको लक्ष्य पछ्याएको पुलिसले निर्धारित ओभरमा ६ विकेट गुमाएर १ सय ३१ रनमा समेटियो । पुलिसका शंकर रानाले नटआउट ९१ रनको पारी सम्हाले ।
६२ बलको सामना गरेका रानाले ५ छक्का र ९ चौका प्रहार गरेका थिए । त्यस्तै, अविशेक कार्कीले २० बनाए । सुदुरपश्चिमका दिपक चन्द र शेर मल्लले समान २/२ र नारायण जोशीले १ विकेट लिए ।
आजै भएको दोस्रो खेलमा विभागिय टोली त्रिभुवन आर्मीले कर्णाली प्रदेशलाई ८ रनले पराजित गरेको छ । टस जितेर ब्याटिङ गरेको आर्मीले निर्धारित २० ओभरमा ५ विकेट गुमाई १ सय ४० रनको योगफल तयार पारेको थियो ।
आर्मीका प्लेयर अफ द म्याच वसिर अहमदले ३८ बलमा २ छक्का र २ चौका प्रहार गरि ४२ रन बनाए । यस्तै,सन्दिप रजालीले नटआउट ४१ रन र सन्तोष कार्कीले ३४ रनको योगदान दिए । कर्णालीका प्रकाश जैशीले २ विकेट लिँदा दिनेश अधिकारी र दिपेन्द्र रावतले १–१ विकेट लिए ।
जवाफमा १ सय ४१ को लक्ष्य पछ्याएको कर्णालीले निर्धारित ओभरमा ६ विकेट गुमाएर १ सय ३२ रन मात्र जोड्यो । कर्णाली लागि दिपेन्द्र रावतले नटआउट ४७ रन बनाउँदा रविन्द्र शाहीले २२ रन र विपिन रावतले १८ रनको योगदान दिए । आर्मीका नितेश पटेलले २ विकेट लिँदा तीर्थराज दास, पवन कार्की, शहाव अलाम वसिर अहमदले १–१ विकेट लिए ।
प्रतियोगिताअन्तर्गत शनिबार पहिलो खेल कर्णाली र एपिएफ र तथा दोस्रो खेल वागमती र लुम्बिनीबीच खेल हुने आयोजक मोरङ क्रिकेट संघका अध्यक्ष महमद साद बाबु कुरैसीले जानकारी दिए ।
