इलाम । इलाम–२ मा उपनिर्वाचनको सरगर्मी बढेकाले एकातिर दलहरु आआफ्ना उम्मेदवार लिएर घरदैलोमा छन् । अर्कातिर आन्तरिक पर्यटकको ठूलो भीड इलाम उक्लिएको छ ।
जिल्लाका चर्चित पर्यटकीय स्थलमा भने नयाँ वर्ष मनाउँदै घुम्न जाने लहर चलेको हो । अन्तुडाँडामा जारी ‘अन्तु पर्यटन महोत्सव’ले घुमन्तेलाई तानेको छ । सूर्योदय नगरपालिकाको आयोजनामा शुक्रबार र शनिबार अन्तु महोत्सव भएको हो ।
आयोजक समिति संयोजक तथा नगरपालिकाका उपप्रमुख दुर्गाकुमार बरालका अनुसार महोत्सवको पहिलो दिन ‘सूर्योदय आइडल’ को ‘ग्रान्ड फिनाले’, विभिन्न खाद्य परिकारका स्टल, दीपावली र सांगीतिक कार्यक्रम गरिएको छ । महोत्सवको दोस्रो दिन शनिबार अन्तुडाँडाबाट सूर्योदय अवलोकन, शुभकामना आदानप्रदान, लोपोन्मुख लाप्चा जातिको वेशभूषा प्रदर्शन, विभिन्न जातजातिको सांस्कृतिक झाँकी प्रदर्शन, खाद्य परिकारका स्टल, ‘सूर्योदय आइडल’को विजेता घोषणा, पुरस्कार वितरण र सांगीतिक लगायतका कार्यक्रम राखिएको बरालले जानकारी दिए ।
अन्तुमा महोत्सव चलिरहे पनि नजिकैको कन्याममा शनिबार आन्तरिक पर्यटकको थेगिनसक्नु भीड लागेको छ । स्थानीय क्लबहरुको आयोजनामा कन्याममा एक साता लामो पर्यटन मेलाको आयोजना गरिएको छ । यसपटक मौसम सफा देखिएपछि कन्याम चिया बगानमा पर्यटकहरुको भीड छ ।
स्थानीय अगुवा सन्तोष गुरुङका अनुसार अन्तुमा चलिरहेको महोत्सवमा र कन्याममा पर्यटकहरुको भीड अत्यधिक छ । ‘मेची राजमार्गसँगै रहेको कन्याममा ‘सर्ट ट्रिप’का पर्यटक बढी देखिएकाले अन्तुमा भन्दा कन्याममा वैशाख १ गतेका दिन पर्यटकको संख्या अत्यधिक छ । स्थानीय युवाहरुले हर्कटे, डुंढेगहिरा, हुरहुरे क्षेत्रमा मेलाको आयोजना गरेकाले पर्यटकले थप मनोरन्जन लिइरहेका छन्,’गुरुङले भने । रोङ गाउँपालिका रहेको सानी पाथीभरा देवीको दर्शनमा आएको पर्यटक पनि कन्याममा रमाउन पुग्ने गरेका छन् ।
कन्याम पूर्वी नेपालको लोकप्रिय वनभोज स्थल पनि हो । कन्याम चिया बगानमा फोटो खिच्न र घोडा चढ्न पर्यटक आकर्षित हुने गरेका छन् । पिकनिक र शैक्षिक भ्रमणमा आउने आन्तरिक पर्यटकले घोडा चढ्ने गरेका छन् । विभिन्न जातजातिको मौलिक पोसाकमा सजिएर तस्वीर खिच्न पाइने भएकाले तन्नेरीहरु बढी झुम्मिएका छन् । कन्याम आसपासका क्षेत्रहरु फिकल, श्रीअन्तु, समालबुङ, पशुपतिनगरको हरियाली दृश्य देखिनुका साथै सगरमाथा, कुम्भकर्ण जस्ता हिमालको दृश्य पनि यहाँबाट देख्न सकिन्छ । पछिल्लो समय भौतिक संरचनाको विकास, पर्यटकीय आकर्षणका पोइन्टहरुको निर्माणले पर्यटकलाई थप आकर्षित गरेको छ ।
