विराटनगर । विराटनगर महानगरपालिका वडा नम्बर–६ को आयोजनामा भोलि सोमबारदेखि टी–१० च्याम्पियनसीप क्रिकेट प्रतियोगिता हुने भएको छ ।
विराटनगर–६ स्थित म्यारीलिबोन विराटनगर ज्वाला क्रिकेट मैदानमा हुने प्रतियोगिताको तयारी पूरा भएको आयोजकले जनाएको छ।
जेठ १४ गतेदेखि २० गतेसम्म संचालन हुने प्रतियोगितामा नेपालका विभिन्न ७ टीमले सहभागिता जनाउने भएका छन्। राष्ट्रिय खेलाडीहरु शरद भेसवाकर, भीम सार्की, विनोद भण्डारी, देव खनाल,दिपेश कडेल विवेक यादव लगायतका खेलाडीले प्रतियोगितामा सहभागिता जनाउने भएका छन्। प्रतियोगितामा प्रथम हुने टोलीले नगद ५ लाख रुपैयाँ, दोस्रो हुने टीमले २ लाख रुपैयाँ, तेस्रो हुने टीमले १ लाख रुपैयाँ र चौथो हुने टीमले ५० हजार रुपैयाँ नगद पुरस्कार प्राप्त गर्ने आयोजकले जानकारी दिएको छ ।
उक्त प्रतियोगिता खेल दिवा र रात्रीकालिन समयमा संचालन हुने आयोजकले जनाएको छ।
