विराटनगर । विराट हेल्थकेयर इन्डष्ट्रिजले ‘विश्व महिनावरी स्वच्छता’ दिवसको अवसर पारेर ईन्टर सिटी कविता वाचन प्रतियोगिता आयोजना गरेको छ ।
मोरङको टंकीसिनुवारी रहेको विराट हेल्थकेयर इन्डष्ट्रिजले मंगलबार विराट टिचिङको सभाहलमा आयोजना गरेको इन्टरसिटी कविता प्रतियोगितामा धरान , ईटहरी र विराटनगरका निजी तथा सामुदायिक विद्यालयले सहभागिता जनाएका थिए । कविता वाचन प्रतियोगितामा ९ विद्यालयका ३० छात्राछात्रहरुले सहभागिता जनाएका थिए ।
कविता वाचन प्रतियोगिताको उपाधि विराटनगरमा रहेको सेन्टेमेरिज स्कुलकी कक्षा ८ मा अध्ययनरत आर्सी पोखरेलले हात पारिन्। २९ जना विद्यार्थीहरुलाई पछि पार्दै आर्शीले कविता प्रतियोगिताको उपाधि जितेकी हुन् ।
उनले उपाधिसँगै नगद १५ हजार रुपैयाँको साथै वाइट मुन सेनेटरी प्याड र क्युरा हेल्थको तर्फबाट विभिन्न गिफ्ट ह्याम्पर जितेकी छिन् ।
यसैगरी प्रतियोगिताको द्धितीय इटहरीस्थित विश्व आर्दश स्कुलकी साइमा कार्की र तृतीय विश्व आदर्श विद्यालयका अदिती भट्टराई भइन् । उनीहरुले क्रमश : ९ हजार रुपैयाँ र ६ हजार रुपैयाँ जितिन् ।
प्रतियोगिताको निर्णायकहरुमा विराट टिचिङ अस्पतालका भाइस चियरमेन डेनिस कार्की, विराट हेल्थकेयर इन्डष्ट्रिज ब्राण्ड मेनेजर दिक्षा थापा, सशिकला तिवारी खड्का लगायत रहेका थिए ।
