विराटनगर । विराटनगरबाट प्रतिबन्धित भारतीय नोटसहित भारतीय र नेपाली नागरिकलाई सशस्त्र प्रहरीले पक्राउ गरेको छ ।
पक्राउ परेकाका उनीहरुको साथबाट भारतीय तीन लाख १७ हजार रूपैयाँ सशस्त्र प्रहरीले बरामद गरेको हो ।
भारतको जोगबनीबाट विराटनगर महानगरपालिका–१७ मटेरुवा हुँदै नेपाल प्रवेश गरेका विराटनगर–७ का २४ वर्षीय रोनक अग्रवाल सोमबार साँझ ६ बजेतिर सशस्त्र प्रहरी बल नेपाल प्रस्तावित सीमा सुरक्षा गुल्म रानीबाट खटिएको टोलीले पक्राउ गरेको हो ।
अग्रवाल प्रदेश १–०२–०५१ प १९३९ नम्बरको मोटरसाइकलमा सवार रहेका थिए । मोटरसाइकलमा शंकास्पद हिसाबले नेपालतर्फ आउँदै गरेका उनलाई नियन्त्रणमा लिएर चेकजाँच गर्दा उनको साथबाट प्रतिबन्धित भारतीय नोट बरामद भएको सशस्त्र प्रहरी बल मोरङका निमित्त प्रमुख डीएसपी लोकनाथ उप्रेतीले जानकारी दिए ।
उनका अनुसार अग्रवालको साथबाट ५ सय दरका ४ सयवटा भारतीय नोट बरामद भएको छ । प्रतिबन्धित नोट र मोटरसाइकलसहित पक्राउ परेका अग्रवाललाई सशस्त्र प्रहरीले आवश्यक अनुसन्धानका लागि इलाका प्रहरी कार्यालय रानीमा बुझाएको छ । नेपालमा ५ सयमाथिका भारतीय नोट प्रतिबन्धित छ।
त्यस्तै, प्रतिबन्धित भारतीय नोटसहित नेपाल प्रवेश गरेका भारतीय नागरिक विराटनगर–१५ स्थित २ नम्बर ढाटबाट राति ८ बजेतिर पक्राउ परेका छन् । भारतको भागलपुर सोनापट्टीका ३६ वर्षीय गौतमकुमार केडियालाई भारतीय एक लाख १७ हजार चार सय ४४ रूपैयाँसहित पक्राउ गरिएको डीएसपी उप्रेतीले बताए ।
उनका अनुसार जोगबनीबाट पैदल नेपालतर्फ आउँदै गर्दा केडियालाई पक्राउ गरिएको हो । केडियाको साथबाट विभिन्न दरका भारतीय नोटहरु फेला परेका छन् । पाँच सय दरका एक सय ८१, दुई सय दरका ६०, सय दरका एक सय १५, ५० दरका ४० थान, २० दरका ३६ र १० दरका ४० थान भारतीय नोट बरामद गरिएको उप्रेतीको भनाइ छ ।
उनका अनुसार भारतीय सिक्काहरु समेत बरामद गरिएको छ । केडियालाई थप अनुसन्धानका लागि नेपाल प्रहरीको जिम्मा लगाइएको सशस्त्रले जनाएको छ । पक्राउ परेका अग्रवाल र केडियाको साथबाट बरामद भएको रकम अवैध हुण्डी कारोबारको हुनसक्ने प्रहरीको अनुमान रहेको छ ।
दुवैजनालाई आवश्यक अनुसन्धान र कारबाहीको प्रक्रिया अघि बढाउन राजस्व अनुसन्धान कार्यालय इटहरीमा बुझाउने तयारी भइरहेको प्रहरीले जनाएको छ ।
