विराटनगर । सटरको कोठा भाडा नदिएको भन्दै प्रिन्सीपलको कुटपिटबाट घाईते भएका मिथिला एजुकेशन कन्सलटेन्सीका मेनेजर सुभम साह अस्पतालमा भर्ना भएका छन् ।
विराटनगर १० मा रहेको कोवास कलेजका प्रिन्सीपल सुनिल श्रेष्ठले कलेज परिसरमा रहेको सटरको भाडा नतिरेको भन्दै कन्सलटेन्सीका मेनेजरलाई सोमबार सुरक्षागार्ड सहितको टोली पुगेर कुटपिट गरेका थिए ।
विगत ५ वर्षदेखी कोबास कलेजको परिसरमा हिमाङसु साहले ३ वटा सटर भाडामा लिएर मिथिला एजुकेशन कन्सलटेन्सी संचालन गर्दैै आएका थिए ।
यता कलेजले ३ वटा सटरको भाडा ३ महिनाको एक मुष्ट १ लाख लिदै आएको थियो । तर कलेजले केही महिनादेखी सटर खाली गरिदिनको लागी आग्रह गर्दै आएको थियो । कलेजले पटक पटक खाली गर्न र भाडा माग्न जादा मेनेजर साहले गाली गलौज गर्ने गरेको प्रिन्सीपल श्रेष्ठको आरोप छ । भाडा माग्न जाँदा गाली गलौज गरेको सहन नसकेर सामान्य हातपात भएको प्रिन्सीपल श्रेष्ठले बताएका छन् । यता कुटपिटबाट घाईते भएका साहको अनुहारको भित्री भागमा चोट परेका कारण टाउको दुख्ने, रिगटा लाग्ने , सास फेर्न अफठ्यारो हुने लक्षण देखिएपछि साह अस्पतालमा भर्ना भएका छन् । उनी विराटनगर रंगेली रोडमा रहेको मकालु एभरेष्ट अस्पतालमा भर्ना भई उपचार गरिरहेका छन् । यता जिल्ला प्रहरी कार्यालय मोरङले प्रिन्सीपलसहित ४ जनालाई नियन्त्रणमा लिएर अनुसन्धान गरिरेहेको मोरङ प्रहरी प्रमुख एसपी नवराज कार्कीले जानकारी दिए।
