किमाथाङ्का । जिल्लाको मकालु गाउँपालिका–४ कारमारङमा अस्थायी प्रहरी चौकी स्थापना गरिएको छ ।
स्थानीयस्तरमा शान्ति सुरक्षा कायम गर्न र आपराधिक क्रियाकलाप नियन्त्रण गर्न चौकीको स्थापना गरिएको हो ।
गाउँमै अस्थायी प्रहरी चौकी स्थापना भएपछि ६ घण्टा पैदल हिँडेर हेदाङ्ना जानुपर्ने बाध्यता हटेको छ । उक्त चौकीको सङ्खुवासभाका प्रमुख जिल्ला अधिकारी धुव्रबहादुर खड्काले उद्घाटन गरे ।
जनताको माग र सरोकारबालाको पहलमा स्थानीयस्तरमा शान्ति सुरक्षा कायम गरी आपराधिक गतिविधि कम गर्न चौकी स्थापना गरिएको जिल्ला प्रहरी कार्यालयका सङ्खुवासभाका प्रहरी नायव उपरीक्षक घनश्याम श्रेष्ठले बताए । चौकीमा प्रहरी हवलदार यामेश्वर धिमालको नेतृत्वमा पाँच जनाको टोली रहने जनाइएको छ ।
