इन्दु साह
विराटनगर । विराटनगरका विद्यालयका विद्यार्थीहरूले पीउने पानीको गुणस्तर मापन हुने नगरेको पाइएको छ। यसले गर्दा विद्यार्थीहरूले कस्तो पानी पीउँदै छन् भन्ने कुरा अज्ञात रहेको छ । जसले उनीहरूको स्वास्थ्यमा गम्भीर असर पार्न सक्ने स्वास्थ्य क्षेत्रका बिज्ञहरुको भनाई छ।
महानगरका संस्थागत र सामुदायिक विद्यालयका विद्यार्थीहरुले दैनिक पीउने गरेको पानीको परीक्षण गर्न आवश्यक छ । अझ विराटनगरमा अहिले वर्षातको समयमा विभिन्न स्थानमा पानीका पाईप लिकेज भएर पानी दुषित हुनसक्ने संभावना धेरै छ । त्यसले गर्दा विद्यालयहरूले नियमित रूपमा पानीको गुणस्तर परीक्षण गर्नुपर्ने हो । यसो नगर्दा विद्यार्थीहरू दुषित पानी पीउन बाध्य हुन सक्छन् । जसले उनीहरूलाई विभिन्न रोगहरूको जोखिममा पार्न सक्छ । पीउने पानी बालबालिकाहरूको स्वास्थ्य र विकासको लागि अत्यन्त महत्त्वपूर्ण छ ।
दुषित पानीले झाडापखाला, हैजा, टाइफाइड, क्यान्सर जस्ता रोगहरू निम्त्याउन सक्ने महानगरपालिका स्वास्थ्य महाशाखा प्रमुख दिलिप यादवले बताए । उनका अनुसार विद्यालयहरुले कम्तिमा पनि ३ महिनाको अन्तारालमा पानीको सुद्धता जाँच गर्नु उपयुक्त हुन्छ । साथै लामो समयसम्म अशुद्ध पानी सेवन गर्दा मृगौला र कलेजोमा समेत असर पर्न सक्छ।
विद्यालयका प्राध्यापकहरुले भने फिल्टर र चापाकलको पानी पिउने भएकोले परीक्षणको आवश्यकता महसुस नगरेको बताए । बच्चाहरू दिनभर विद्यालयमा रहन्छन् र त्यहाँको पानी पिउने गरेको उनीहरु बताउँछन् । महानगरपालिकाको शैक्षिक प्रशासन महाशाखाका अधिकारीहरुले विद्यालयले आवश्यकता महशुस भए परीक्षण गर्नुपर्ने बताए ।
